GBIME

बजारमा दशैंको चहलपहल अझै शुरु भएन : व्यापारी तनावमा, मजदूरले काम पाएनन्


बिजखबर संवाददाता
23 September, 2021 12:02 pm

बजारमा दशैंको चहलपहल अझै शुरु भएन : व्यापारी तनावमा, मजदूरले काम पाएनन्

काठमाडौं । व्यापारीदेखि मजदूरसम्ममा उत्साह जगाउने दशैंको समय नजिकिएपनि काठमाडौंका मुख्य व्यापारिक केन्दमा अहिलेसम्म चहलपहल शुरु नहुँदा निराशा छाएको छ । अघिल्ला बर्षहरुमा दशैंका लागि एक महिना अघिदेखि नै व्यापारिक चहलपहल शुरु हुने भएपनि दशैं शुरु हुन ३ हप्ता बाँकी रहँदा पनि दशैंको चहलपहल शुरु हुन नसकेकोा व्यवसायी बताउँछन् ।

Bajaj
Nabil
Yamaha

विशेष गरि दशैंको समयमा सबैभन्दा बढी विक्री हुने रेडिमेड लुगाका लागि नेपालभरका खुद्रा बजारका लागि होलसेल मार्केटका रुपमा चिनिएका महाबौद्ध, ओटु, न्यूरोड क्षेत्रमा यो वर्ष अहिलेसम्म चहलपहल देखिएको छैन् । यो क्षेत्रबाट नेपालका प्राय बजारमा लत्ताकपडा, इलेक्ट्रोनिक बस्तुसम्म पुग्ने गरेको छ । न्यरोड क्षेत्रमा प्राय भीडभाड भइ रहने भएपनि दशैं, तिहारलगायत चाडपर्वहरु आउनुभन्दा १ महिना अघिदेखि भने विशेष भीड देखिने गर्दथ्यो । देशभरका खुद्रा व्यवसायीहरुले दशैंकै लागि भन्दै लत्ताकपडालगायतका वस्तुहरु लैजाने हुनाले विशेष भीडभाड देख्न सकिन्थ्यो ।

यो बर्षको दशैंमा भने यस्तो रौनक न्युरोड क्षेत्रमा देखिँदैन । अर्थात दशैंका लागि आउने व्यवसायीहरु यो बर्ष अघिल्ला बर्षहरुजस्तो नआएसँगै उक्त क्षेत्रका व्यवसायीको व्यापार व्यवसाय पनि भनेबमोजिम चलेको छैन ।

jagadamba_cement

मजदूरहरु खाली हात

अघिल्ला बर्षहरुमा फुर्सद नपाउने न्युरोड क्षेत्रका मजदूर तथा भरियाहरु अहिले खाली हात काम कुरेर बसेको देख्न सकिन्छ । धेरैले अहिले समय कटाउन लुँडो खेलिरहेको देख्न सकिन्छ । कामै नभएपछि यताउता घुम्ने र लुँडो खेल्नेबाहेक काम नहुने एक भरियाले बताए । उनका अनुसार अघिल्ला बर्षहरुमा उनीहरुको यतिखेर
काम भ्याइनभ्याइ हुन्थ्यो । हाल उक्त क्षेत्रमा प्राय भरियाहरु फुर्सदिला देखिन्छन् । ‘अघिल्ला बर्षहरुमा बजारमा व्यवसायीहरु टनाटन हुन्थे,’ उनले भने, ‘यो बर्ष अवस्था फेरियो हामी हालसम्म खाली छौं, काम गर्न पाएका छैनौं ।’ अघिल्ला बर्षहरुमा निश्चित पसलहरुबाट गाडीसम्म भारी बोकेर लिएवापत दैनिक ३ हजार रुपैयाँसम्म कमाउने भरियाहरुको दिनभर हात खाली हुनेगरेको छ ।

चीनबाट सामान आएन

यता चीनतर्फबाट सामान नआउँदा पनि बजारमा चहलपहलमा कमी आएको हिमालयन सीमापार वाणिज्य संघका उपाध्यक्ष नयन पण्डित क्षेत्री बताउँछन् । उनका अनुसार बजारमा बाहिरबाट सामान आएपछि देशभरका व्यवसायीलाई सूचना पुग्छ र सामान उठाउन आउँछन् । हाल त्यसो नभएपछि यसपाली बजारमा कमै चहलपहल देखिएको उनले बताए ।

तर, बजारमा भएको स्टक सामानको विक्री भने राम्रै भइरहेको उनको भनाई छ । यता नेपाल राष्ट्रिय व्यवसायी महासंघका अध्यक्ष नरेश कटुवाल पनि कोरोना महामारी, बजारमा सामानको कमी, चीनबाट सामान नआउनुलगायतका कारणले चहलपहलमा कमी आएको बताउँछन् । उनका अनुसार चीन र नेपालको नाकाहरुबाट पछिल्ला दिनहरुमा पर्याप्त मात्रामा सामान नआएपछि बजारमा सामान नपुगेका कारण पनि चहलपहलमा कमी आएको छ ।

प्रतिक्रिया दिनुहोस्

Nepal_telecom