काठमाडौं । भियतनाम चाँडै दक्षिण–पूर्वी एशियाको सबैभन्दा लोकप्रिय पर्यटक गन्तव्य बनिरहेको छ । यसको कारण यहाँ पर्यटकले एउटै देशका विभिन्न प्रकारका प्राकृतिक दृश्यहरूको आनन्द लिन सक्छन् । कतै टाढा–टाढा फैलिएका समुद्र तटहरू छन् त कतै पहाडमा सुन्दर धानबारी छन् । उनीहरू सहरहरूमा विभिन्न गतिविधिहरूको पनि आनन्द लिन्छन् ।

गुगल डेस्टिनेशन इनसाइट्सको रिपोर्ट अनुसार मार्चदेखि जुनसम्म सबैभन्दा धेरै खोजिने गन्तव्यमा भियतनाम सातौं र शीर्ष २० मा दक्षिण–पूर्वी एसियाको एक मात्र देश थियो । भियतनाममा आउने विदेशी पर्यटकको संख्याले यो देश कति लोकप्रिय भएको छ भन्ने देखाउँछ । भियतनामको राष्ट्रिय पर्यटन प्रशासनले जुनमा सन् २०२३ को पहिलो ६ महिनामा ५५ लाखभन्दा बढी विदेशी पाहुनाहरूलाई स्वागत गरेको बताएको थियो । २०२२ मा पनि यति धेरै विदेशी भियतनाम पुगेका थिएनन् ।

पर्यटकको संख्यामा वृद्धि हुने अनुमान

भियतनामको पर्यटन उद्योगले सन् २०२३ को ६ महिनामा त्यहाँ करिब ८० लाख पर्यटक आउने अपेक्षा गरेको छ । तर, यो संख्या बढेर एक करोड पुग्न सक्ने पर्यटन ब्यूरोले अनुमान गरेको छ । रुस्टिक हस्पिटालिटी ग्रुपका अध्यक्ष बबी नुयनले चीन, भारत र कोरियाबाट आउने पर्यटकको सङ्ख्या बढेको बताए । उनले भने, ‘चीनले भियतनाममा आफ्नो बजार पुनः खोलेको छ र भारतीय बजार २०२२ बाट बढिरहेको छ ।’

सामाजिक सञ्जालको प्रयोग र पर्यटकको ठूलो आगमनले पनि भियतनामको अन्तर्राष्ट्रिय स्तरमा लोकप्रियता बढाउन मद्दत गरेको न्युएनले बताए । उनले यो पनि भने, ‘फेसबुक, इन्स्टाग्राम, टिकटक, गुगलका प्रमोशनल च्यानलहरू वा अन्य नेटवर्किङ च्यानलहरू जस्ता सोशल मिडिया प्लेटफर्महरू पनि विश्वभर भियतनामको छवि द्रुत रूपमा सुधार गर्न सहयोगी साबित भइरहेका छन् ।’ महामारीपछि नेपालका प्रमुख छिमेकी चीन र भारत तथा कोरियाबाट भियतनाम आउने पर्यटकको संख्या बढेको छ । महामारीपछि चीन, भारत र कोरियाबाट भियतनाम आउने पर्यटकको संख्या बढेको छ र ।

नयाँ भिसा नीतिको प्रभाव

भियतनामले भर्खरै देशमा अन्तर्राष्ट्रिय आगन्तुकहरूका लागि नयाँ भिसा नीति अनुमोदन गर्यो । जसमा छनोट गरिएका देशहरूका लागि भिसा छुट १५ दिनबाट तीन गुणा बढाएर ४५ दिन बनाइएको छ । यसको अर्थ छनोट भएका देशका मानिसहरु विना भिसा ४५ दिनसम्म पर्यटन वा व्यवसायका लागि देशमा बस्न सक्नेछन् । साथै, इलेक्ट्रोनिक भिसाका लागि आवेदन दिन सक्ने देशका मानिसहरूको भिसा अब ९० दिनसम्म मान्य हुनेछ । यस अवधिमा, तिनीहरू एक वा धेरै पटक देश भ्रमण गर्न सक्छन् ।

यी परिवर्तनहरू अगस्त १५ देखि लागू हुनेछन् । क्वालालम्पुरका पर्यटन विश्लेषक ग्यारी बोवरम्यानले भिसा नियम परिवर्तनले पर्यटन क्षेत्रलाई बढावा दिने बताए । उनले भने, ‘यहाँ आउने पर्यटकको संख्या बढ्दै गएको छ । यो वृद्धि आगामी छ महिनामा प्रस्ट देखिनेछ । मलाई लाग्छ, पर्यटन क्षेत्र निकै तीव्र गतिमा बढ्नेछ, किनभने अहिले चीनसँगको व्यापारिक सम्बन्धमा पनि सुधार आएको छ ।’

बोवरम्यानले भियतनामको लोकप्रियताको एउटा कारण मानिसहरूलाई यसको बारेमा धेरै थाहा नहुनु पनि रहेको बताए । तसर्थ, यहाँ पर्यटन र व्यापार दुवै अवसरहरू उपलब्ध छन् । उनले भने, ‘यहाँ धेरै युवाहरू छन् जो यो देशको बारेमा धेरै जान्न चाहन्छन् । भियतनाममा धेरै ठाउँहरू र चीजहरू छन् जसको बारेमा मानिसहरूलाई कम थाहा छ । मानिसहरूलाई थाइल्याण्डको बारेमा बढी थाहा छ । मानिसहरू भियतनामबारे बारेमा जान्न इच्छुक छन् । उनीहरु यो देशमा लगानी गर्न, व्यापार गर्न र यात्रा गर्न लालायित छन् ।’ भियतनाम प्राकृतिक सौन्दर्यको हिसाबले ठूलो विविधता भएको देश हो जहाँ पर्यटकहरूले एकैपटक धेरै कुराहरू हेर्न सक्छन ।

पर्यटन उद्योगको आशा

भियतनामका ट्राभल कम्पनीहरू पनि नयाँ भिसा नीति र विदेशी आगन्तुकहरूको सम्भावित वृद्धिलाई लिएर उत्साहित छन् । फ्युज होस्टल एण्ड ट्राभलका मालिक म्याक्स ल्याम्बर्टले भने, ‘भविष्यमा के हुन्छ हेर्न म तत्पर छु ।’ फ्यूजले गत वर्षको अन्तमा लोकप्रिय शहर होई एनमा दुई नयाँ होस्टलहरू खोल्यो । ल्याम्बर्टले पहिले नै आफ्नो कम्पनीले कोरोना महामारी अघिको जस्तै काम गरिरहेको छ भनेर अनुमान गरिसकेका छन् । ‘हामीले विगत तीन महिनादेखि होस्टेलमा बस्ने विदेशी पाहुनाको संख्यामा उल्लेख्य बृद्धि भएको देखिरहेका छौँ । हाम्रो बुकिङ लगभग २०१९ लेभलमा पुगिसकेको छ । मलाई लाग्छ कोरोनाको महामारीले पर्यटन बजारमा प्रभाव पारेको छ,’ उनले भने ।

थाइल्याण्डसँग प्रतिस्पर्धा

भियतनाममा विदेशबाट आउने पर्यटकको संख्या प्रि–महामारीको स्तरभन्दा अझै कम छ । सन् २०१९ मा करिब १.९ करोड विदेशी पर्यटक भियतनाम आएका थिए । ‘यसको अर्थ भियतनामले पर्यटनमा थाइल्यान्डसँग प्रतिस्पर्धा गर्ने हो भने लामो यात्रा गर्न बाँकी छ,’ ल्याम्बर्टले भने । ‘थाइल्याण्ड आउने पर्यटकको संख्या अझै धेरै छ । थाइल्याण्ड पर्यटन क्षेत्रमा ठूलो खेलाडी हो । भियतनामलाई त्यो बिन्दुमा पुग्न धेरै समय लाग्नेछ ।’ टुर एजेन्सी रस्टिक हस्पिटालिटी ग्रुपका अध्यक्ष बबी नुएनले भियतनामले आफ्नो सम्भावनाको पूर्ण उपयोग गर्न धेरै क्षेत्रमा सुधार गर्नुपर्ने बताए ।
उनले भने, ‘पर्यटन एक एकीकृत अर्थतन्त्र हो, यस क्षेत्रलाई सुधार्न विभिन्न मन्त्रालय र क्षेत्रबीचको सम्बन्ध राम्रो हुनुपर्छ, राजमार्ग, रेलमार्ग, सडकलगायतका पूर्वाधारले पर्यटन उद्योगको विकासमा टेवा पुर्याउने मापदण्ड पूरा गर्दैन । उनले भने, ‘पर्यटन क्षेत्रमा गुणस्तरीय सेवा दिन यस उद्योगमा आवद्ध नयाँ कर्मचारीलाई पुनः तालिम दिन आवश्यक छ ।’ थाइल्याण्डले सन् २०२३ को अन्त्यसम्ममा दुई करोड विदेशी पर्यटक आफ्नो देश पुग्ने अपेक्षा गरेको छ । तर, थाइल्याण्डको पर्यटन उद्योगले अझै सन् २०१९ को स्तरमा फर्कने प्रयास गरिरहेको छ । त्यतिबेला कीर्तिमानी ३.९ करोड विदेशी पर्यटक स्वदेश पुगेका थिए ।

विश्लेषक बोवरम्यानले भने, ‘थाइल्याण्ड यस क्षेत्रको पर्यटनको हिसाबले सबैभन्दा लोकप्रिय देश हो । अहिलेको लागि यो जहाँ छ, त्यही रहनेछ । यो देशले पर्यटनको हिसाबले साँच्चै राम्रो काम गरिरहेको छ ।’ उनले थपे, ‘कोरोना महामारी अघि भियतनामलाई चुनौतीपूर्ण देशका रूपमा नभई पर्यटनको क्षेत्रमा द्रुत रूपमा उदीयमान मुलुकका रूपमा हेरिएको थियो । भियतनाम दक्षिण–पूर्वी एसियामा पर्यटनको हिसाबले दोस्रो सबैभन्दा लोकप्रिय देशको रूपमा हेरिएको थियो । यो अवस्था अझै यथावत छ भन्ने मलाई लाग्छ ।’ अनुवाद गरिएको