काठमाडौ । सरकार लक्ष्य अनुरुप राजस्व संकलन गर्न असफल भएको छ । सरकारले गत आर्थिक बर्षमा पछिल्लो संसोधित अनुमान अनुसार ८ खर्ब ६० अर्ब रुपैयाँ राजस्व उठाउने लक्ष्य लिएको थियो । तर, आर्थिक बर्षको अन्त्यसम्ममा ८ खर्ब ३६ अर्ब रुपैयाँ मात्र संकलन भएको अर्थ मन्त्रालयका योजना, अनुगमन तथा मूल्याङन महाशाखाका सहसचिव उत्तरकुमार खत्रीले जानकारी दिए ।
सरकारले गत बर्षको बजेट सार्वजनिक गर्दा ९ खर्ब ४५ अर्ब रुपैयाँ राजस्व संकलन गर्ने लक्ष्य लिएको थियो । तर लक्ष्य अनुरुप राजस्व संकलन नहुने देखिएपछि दोस्रो पटक संसोधन गर्दै ८ खर्ब ६० अर्ब रुपैयाँमा झारेको थियो ।
विशेषगरी सरकार आयकर र मूल्य अभिवृद्धि कर उठाउन नसक्दा समग्र राजस्व परिचालनमा समस्या आएको हो । सरकारले गत आर्थिक वर्षमा २ खर्ब ९ अर्ब ६८ करोड रुपैयाँ आयकर उठाउने लक्ष्य राखेको थियो । त्यसमा १ खर्ब ९० अर्ब रुपैयाँ मात्र उठाएको छ ।
यसैगरी सरकार बजेट खर्च परिचालनमा पनि असफल भएको छ । सरकारले पछिल्लोपटक संसोधित खर्च अनुमान पनि परिचालन हुन सकेको छैन । पछिल्लो पटक संसोधित अनुमानको करिव ८५ प्रतिशत मात्र बजेट खर्च भएको खत्रीले जानकारी दिए ।
