काठमाडौं ।तीज पर्वले यहाँको बजार चलायमान बनाएको छ। बर्सातका कारण सुनसान रहेको बजार क्षेत्र तीज अघिदेखि नै चलायमान बनेको हो। मुख्यगरी कपडा, कस्मेटिक, सुन, ब्युटीपार्लर, पार्टी प्यालेस, होटल क्षेत्रमा चहलपहल बढाएको हो।
ठूला साना यातायातका साधनको चहलपहल बढ्दा यातायात व्यवसायी पनि लाभान्वित भएका छन्। व्यवसायीले सोचेजस्तो व्यापार भने हुन नसकेको बताएका छन्। गाउँगाउँमा पसल खुलेका र अनलाइनबाट व्यापार हुने भएकाले मुख्य बजार क्षेत्रका पसलको व्यापार भने विगतजस्तो छैन।
अघिल्ला वर्षहरुमा तीजमा दर खाने समय लामो हुँदा होटल तथा पार्टी प्यालेसहरुको व्यापार राम्रो हुने गरेको भए पनि अहिले सोचेअनुसार नभएको होटल व्यवसायी संघ चितवनका अध्यक्ष लोकनाथ भट्टले बताए। उनले भने, ‘होटलहरुमा व्यवसाय खासै छैन, पार्टी प्यालेस भने केही चलेका छन्।’
अघिल्ला वर्षहरुमा दर खाने मिति पछि हुने हुँदा केही व्यवसाय उकासिने गरेको भए पनि अहिले तीज छिट्टै आएका कारण अपेक्षाकृतरुपमा व्यापार नभएको उनको भनाइ छ। साउन महिनामा चोखो खाने भएकाले भदौ लागेपछि मात्रै तीजको चहलपहल भएको हो। आम नागरिकसँग क्रयशक्ति कम हुँदा पनि व्यवसायमा सोचेजस्तो हुन नसकेको उनको भनाइ छ।
अनलाइन व्यापार राम्रो भए पनि पसलहरुको व्यापार कम भएको कपडा व्यवसायीको गुनासो छ। कपडा व्यवसायी संघका अध्यक्ष गुणराज पौडेलले पछिल्लो समय अनलाइनमा ५ सयदेखि एक हजार रूपैयाँसम्मका साडी पाउने भएपछि उपभोक्ता त्यतै केन्द्रित भएको बताए। उनले भने, ‘अघिल्ला वर्षहरुमा १०/२० हजार बोकेर बजार आउने ग्राहक अहिले दुई-तीन हजार रूपैयाँ लिएर आउने गरेका छन्।’
अघिल्ला वर्षहरुको जस्ता तडकभडक नहुँदा पनि व्यवसायमा सोचेजस्तो नभएको उनले बताए। उनले थपे, ‘रमाउने उमेरका युवायुवती विदेश पलायन हुनु र खर्च गर्ने क्षमता समेत घट्नुले व्यवसायमा समेत प्रभाव परेको देखिन्छ।’ आर्थिक मन्दीका कारण मान्छेको चाप भए पनि खरिद गर्ने ग्राहक खासै नभएको उनले बताए।
न्यू लोकमान एण्ड सन्स (सुनचाँदी पसल)का सञ्चालक ज्ञानेन्द्रमान शाक्य बजारमा चहलपहल बढे पनि व्यापार निकै घटेको बताउँछन्। उनले भने, ‘मानिसलाई खान मुस्किल छ, कसरी सुन किन्नु?’ सुनको मूल्य निकै बढेकाले पनि व्यापारमा कमी आएको उनको भनाइ छ। सुन लगाउँदा जोखिम बढेको भन्दै उनले ‘फटाहा र प्रशासनको आँखा पर्छ’ भनेर पनि सुन लगाउने घटेको बताए। पहिलेको तुलनामा ८० प्रतिशत व्यापार घटेको शाक्यले बताए।
उद्योग वाणिज्य संघ चितवनका अध्यक्ष सुमनकुमार श्रेष्ठ बजारमा मानिसको चहलपहल भए पनि अघिल्ला वर्षको जस्तो व्यापार हुन नसकेको बताउँछन्। उनले भने, ‘चाडपर्व सुरु हुँदासमेत व्यापार अपेक्षाकृत रुपमा बजारमा हुन सकेन।’
चाडपर्व मनाउने युवा जनशक्ति विदेश जानुले व्यवसाय अपेक्षाकृत हुन नसकेको उनको अनुमान छ। अहिलेको आर्थिक मन्दीका कारण पनि व्यवसायमा असर देखिएको उनले बताए। रासस
