काठमाडौं । चालु आर्थिक बर्षको पहिलो महिना साउनमा मात्रै नेपालले साढे ४४ अर्ब बढी सार्वजनिक ऋण थपेको छ । सार्वजनिक ऋण व्यवस्थापन कार्यालयले जारी गरेको तथ्यांक अनुसार साउनमा मात्रै आन्तरिक र बाह्य गरी नेपालले कुल ४४ अर्ब ५७ करोड ४८ लाख रुपैयाँ ऋण प्राप्ति गरेको छ ।
यसमा आन्तरिक ऋणको हिस्सा ४० अर्ब हुँदा बाह्य ऋण जम्मा ४ अर्ब ५७ करोड रुपैयाँ बराबर मात्रै छ ।
यसरी साउनमा मात्रै ४४ अर्ब रुपैयाँ बढी सार्वजनिक ऋण थपिँदा हालसम्म नेपालले तिर्न बाँकी सार्वजनिक ऋण २६ खर्ब ८३ अर्ब ६० करोड रुपैयाँ माथि पुगेको कार्यालयले जानकारी दिएको छ । यो नेपालको कुल गार्हस्थ उत्पादन (जीडीपी)को ४३.९४ प्रतिशत हो । कार्यालयका अनुसार कुल सार्वजनिक ऋण दायित्वमा आन्तरिकतर्फको ऋण दायित्व १२ खर्ब ८१ अर्ब १२ करोड रुपैयाँ रहँदा बाह्यतर्फ भने १४ खर्ब २ अर्ब रुपैयाँ बराबर रहेको छ ।
यस्तै गएको साउन महिनामा नेपालले ऋण दायित्वमध्ये ३० अर्ब ५५ करोड रुपैयाँ भुक्तानी गरेको छ । जसमा आन्तरिकतर्फ २७ अर्ब १० करोड र बाह्यतर्फ ३ अर्ब ४५ करोड रुपैयाँ भुक्तानी भएको देखिन्छ ।
चालु आर्थिक बर्ष २०८२/८३ मा सरकारले कुल ५ खर्ब ९५ अर्ब रुपैयाँ सार्वजनिक ऋण परिचालन गर्ने लक्ष्य लिएको छ । जसमध्ये साउनमा मात्रै कुल लक्ष्यको ७.४८ प्रतिशत ऋण प्राप्ति भएको देखिन्छ । चालु आवमा सरकारले ऋण सेवा खर्च शिर्षकमा ४ खर्ब ११ अर्ब रुपैयाँ विनियोजन गरेकोमा साउनसम्म कुल विनियोजनको ८.९३ प्रतिशत भुक्तानी भएको छ ।
