काठमाडौं । सरकारले सार्वजनिक यातायातका सवारीसाधनमा पूर्ण क्षमतामा यात्रु राखेर ओसारपसार गर्न पाउने निर्णय गरेपनि कार्यान्वयन हुन सकेको छैन । मन्त्रिपरिषदको गतहप्ता बसेको बैंठकले बैठकले सार्वजनिक यातायातमा पूर्ण क्षमतामा यात्रु राखेर बस चलाउनेगरी निर्णय गरेको थियो । मन्त्रिपरिषद्ले निर्णय गरेपनि यातायात व्यवसायीहरुले भने उक्त निर्णयको अझैपनि कार्यान्वयमा ल्याएका छैनन ।

मन्त्रिपरिषद् बैंठकले निर्णय गरेपनि सरकारी तर्फबाट कुनै आधिकारिक पत्र नआएकाले हालसम्म उक्त निर्णय कार्यान्वयनमा ल्याउन नसकेको काठमाडौंको गोंगबूस्थित नयाँ बसपार्कको व्यवस्थापन जिम्मेवारी पाएको ल्होत्से बहुउद्देश्यीय कम्पनीका महाप्रवन्धक सुनिल कुँवर बताउँछन् । उनका अनुसार हालसम्म पनि सरकारले तोकेको पहिलेको भाडादरमा ५० प्रतिशत थपेर सिट संख्याको ५० प्रतिशतमात्रै यात्रु बोकिरहेका छन् ।

यसअघि व्यवसायीहरुले सरकारले नै हवाईजहाज र सडकमा गुड्ने सार्वजनिक यातायातको भाडा र यात्रुसंख्यामा मतभेद गरेको बताउँदै आएका थिए । सरकारले सोहीअनुसार निर्णय गरेपनि यातायात व्यवसायीहरुले भने उक्त निर्णयको कार्यान्वयन गरिसकेका छैनन् ।

लामो रुटमा खाली खाली बस गुड्दै

अघिल्ला बर्षहरुमा यस्तै समयमा अर्थात दशैंको मौकामा दैनिक ५ देखि ६ सय ओटा बसहरु काठमाडौंबाट बाहिर जानका लागि छुट्थे । तर हाल उक्त संख्या घटेर दैनिक १ सय ८० ओटा बसमात्रै छुटिरहेको ल्होत्सेका महाप्रबन्धक कुँवर बताउँछन । उनका अनुसार उक्त १ सय ८० ओटा बसमा पनि प्रतिबस ८ देखि १२ जना मात्रै बाहिर जाने गरेका छन् । ‘गत बर्षहरुमा यही समयमा प्रतिदिन ७ देखि ९ हजारसम्म मानिसहरु काठमाडौं छोडेर बाहिर जान्थे, अर्थात प्रतिदिन ५ देखि ७ सय गाडीले पनि पुग्दैन थियो,’ उनले भने, ‘तर यो बर्ष पुरै खडेरी लागेको जस्तै छ ।’

उनका अनुसार कलेज, स्कुलहरु पहिल्यै बन्द भएपछि लकडाउनका अवधिमै काठमाडौंमा बस्ने प्राय विद्यार्थिहरु र डेरामा बस्नेहरु पहिल्यै गईसकेका कारण हाल यात्रुको संख्या कम भएको हो ।

दशैंपछि अनलाईन टिकेटिङको व्यवस्था गरिँदै

यातायात व्यवस्था विभागले मंगलबार मात्रै यातायात व्यवसायीहरुले अनलाई टिकेटिङको व्यवस्था गर्नेगरी नयाँ निर्देशिका जारी गरेको छ । जसका लागि बसपार्क व्यवस्थापकले समेत लामो तथा मध्यम दुरीमा चल्ने सार्वजनिक यातायातका लागि अनलाईन टिकेटिङको व्यवस्था गर्न लागेको हो ।

बसपार्क व्यवस्थापक ल्होत्सेको महाप्रवन्धक कुँवरका अनुसार हाल कोरोनाका कारण सफ्टवेयर निर्माणमा केही समस्या आएको र व्यवस्थापनमा पनि केही समस्याका कारण दशैपछि लगत्तै सफ्टवेयरमार्फत अनलाईन टिकेटिङको व्यवस्था गरिनेछ ।

हाल ल्होत्सेले बसपार्कमा डिजिटल सुचनापार्टी तथा कोरोनाका बेलामा सम्पुर्ण व्यवास्थासमेत मिलाईसकेको छ । ल्होत्सेका महाप्रवन्धक कुँवरका अनुसार अनलाईन टिकेटिङको सबै व्यवस्था भईसकेको र अब सफ्टवेयर आउनेवित्तीकै यात्रुहरुले अनलाईनमार्फत टिकट लिन पाउने व्यवस्था हुनेछ ।