काठमाडौँ । जापानको आन्तरिक मामिला मन्त्रालयले शुक्रबार सार्वजनिक गरेको तथ्याङ्क अनुसार, टोकियोको मूल उपभोक्ता मूल्य सूचकाङ्क चालू अगस्त महिनामा अघिल्लो वर्षको सोही महिनाको तुलनामा २.५ प्रतिशतले वृद्धि भएको छ ।
सन् २०२० लाई आधार वर्ष मानेर बनाइएको सूचकाङ्क १०० मा रहँदा यस पटकको सूचकाङ्क ११०.० पुगेको छ । यो वृद्धि दर अघिल्लो अगस्त महिनासँग समान रहेको मन्त्रालयले जनाएको छ ।
खाद्यान्नको मूल्य निरन्तर बढिरहेको छ । ताजा वस्तुहरू बाहेक प्रशोधित खाद्य वस्तुहरूको मूल्य ६.९ प्रतिशतले बढेको छ । विशेष रूपमा चामलको मूल्य ४६.८ प्रतिशत, चकलेटको ५३.८ प्रतिशत र कफीको दानाको मूल्य ४७.८ प्रतिशतले वृद्धि भएको देखिएको छ ।
यो वृद्धि केही मात्रामा सन्तुलनमा पार्ने गरी, टोकियो महानगरपालिकाले चालू सेप्टेम्बर १७ गतेदेखि बालबालिका स्याहार शुल्क माफ गर्ने कार्यक्रम विस्तार गरेपछि बाल स्याहार सेवाको शुल्कमा ६०.४ प्रतिशतको कमी आएको छ ।
टोकियोको मूल्य सूचकाङ्कलाई देशभरको महँगीको प्रवृत्ति देखाउने प्रमुख सङ्केतकको रूपमा लिइन्छ । सम्पूर्ण जापानको चालू महिनाको उपभोक्ता मूल्य सूचकाङ्क आगामी अक्टोबर २४ गते सार्वजनिक गरिने कार्यक्रम रहेको छ ।
