बिजखबर संवाददाता
२२ माघ, काठमाडौं । नेपाल टेलिकमले आफ्ना ग्राहकलाई महशुलमा ११ प्रतिशतसम्मको छुट दिने भएको छ । टेलिकमले बिहीवार आफ्नो ११औं बार्षिकोत्सवको अवसरमा उक्त योजना सार्वजनिक गरेको हो । माघ २२ देखि २९ गतेसम्म दिइने उक्त छुट जीएसएम तथा स्काइफोनको पोष्पेड र प्रिपेडमा लागु गरिने बताइएको छ । त्यस्तै पीएसटीएन सेवाका ग्राहकहरुलाई भने फागुन महिनाको विलमा ११ प्रतिशत छुट दिइने जानकारी दिएको छ ।
जीएसएम तथा स्काइका पोष्पेड मोवाइलमा हालको मासिक महसुलमा थप ३ सय एमबी डाटा निशुल्क उपलब्ध गराइने भएको छ । यो योजना फागुन ३० गतेसम्म लागु हुने बताइएको छ ।
टेलिकमले जीएसएम तथा स्काइ मोवाइलका नयाँ सिम र रिममा पनि विभिन्न सुविध थप गरेको छ । कम्पनीले संस्थागत सामाजिक उत्तरदायित्व अन्तर्गत महिला स्वास्थयकर्मीहरुलाई एफसीएचभी प्याकेज उपलब्ध गराएको छ । जसअनुसार सो प्याकेज प्रत्येक १० मिनेट कुरा गर्दा रु १ बोनस स्वरुप उपलब्ध गराइएको छ ।
बार्षिकोत्सवको उद्दघाटन गर्दै सुचना तथा सञ्चार मन्त्री मिनेन्द्र रिजालले टेलिकमको सेवा सस्तो भएपनी गुणस्तरिय नभएकोले यसलाई सुधार गर्नुपर्ने बताए । ‘सस्तो र गुणस्तरीय सेवा प्रदान गर्ने क्षेत्रसँग प्रतिशस्पर्धा गर्नुपर्ने देखिन्छ,’ उनले भने । साथै उनले एनटीसीको मात्र उपस्थिती रहको क्षेत्रलाई बढावा दिन सुझाए । टेलिकमलाई ल्याण्डलाइनमा भ्यालु एड गरी उक्त सेवाबाट कमाइ गर्न सुझाए । टेलिकमलगायत अन्य कम्पनीले ‘फोर जी’ सेवा सुरु गर्न माग गरेपनि प्राविधिक कठिनाइका कारण अहिलै सुरु गर्न नसकिने जानकारी दिए ।
सो अवसरमा टेलिकमका प्रवन्ध निर्देशक बुद्धिप्रसाद आचार्यले कम्पनीको एक दशक अत्यन्तै उपलब्धिमुलक रहेको बताए । उनका अनुसार कम्पनीका ग्राहक संख्या १ करोड १७ लाख पुगेको छ । त्यस्तै कम्पनीको कुल आय ७ अर्व ६६ करोडबाट बृद्धि भइ आव ०७०÷ ७१ सम्म ३९ अर्व ६९ करोड पुगेको छ । टेलिकमले कुल टेलिघनत्वको ४५ प्रतिशत र डाटा सेवा तर्फ ५५ प्रतिशत हिस्सा ओगटेको उनको दावी छ ।
कम्पनीले आगामी दिनमा अप्टिकल फाइवर नेटवर्कलाई मुख्य शहरहरुमा विस्तार गरी फिथ सेवा उपलब्ध गराउने जानकारी दिएको छ । साथै चालुआवमा हुम्ला र डोल्पा जिल्लासम्म माइक्रोवेभ रेडियो लाइन विस्तार गर्ने बताएको छ । मुलुकका विभिन्न स्थानहरुमा वाइम्याक्स हटस्पट स्थापना गरी डाटा सेवा विस्तार गर्ने बताएको छ ।
कार्यक्रममा दूरसञ्चार प्राधिकरणका अध्यक्ष दिगम्वर झाले २०१८ सम्म हरेका गाउँमा टेलिफोन पु¥याउने योजना अनुरुप अगाडी बढ्नुपर्ने बताए । कार्यक्रममा कम्पनीका १० उत्कृष्ट कर्मचारीलाई पुरस्कृत गरेको थियो । उनीहरुलाई ३० हजार नगद र सम्मानपत्र प्रदान गरिएको थियो । त्यस्तै बढी रिचार्ज कार्ड विक्री गर्ने पाँच विक्रेतालाई सम्मान गरेको थियो ।
