काठमाडौं । रिलायन्स इण्डष्ट्रिजका अध्यक्ष र एशियाका सबैभन्दा धनी व्यापारी मुकेश अम्बानीको बैंक ब्यालेन्स मात्र ठूलो छैन्, उनीसँग ठूलो हृदय पनि छ । आफ्ना कर्मचारीहरूलाई मद्दत गर्न सधैं तत्पर रहने मुकेश अम्बानीले भर्खरै आफ्ना एक पुरानो कर्मचारीका लागि १,५०० करोड भारु (२४ अर्ब नेपाली रुपैयाँ) को घर किनेका छन् । अम्बानीले आफ्नो पुरानो कर्मचारी र साथीका लागि मुम्बईको एक भीआइपी क्षेत्रमा २२ तले भवन किनेका हुन् । वर्षौंदेखि रिलायन्समा काम गरिरहेका मनोज मोदीलाई मुकेश अम्बानीले २२ तले भवन उपहार दिएका छन् । मनोज मोदी जसलाई अम्बानीको दाहिने हात भनिन्छ, कम्पनीको स्थापनाकालदेखि नै कम्पनीसँग छन् । उनी रिलायन्सका कर्मचारी मात्र नभएर मुकेश अम्बानीका साथी पनि हुन् ।

को हुन् मनोज मोदी ?

मनोज मोदीलाई धेरैले अम्बानीको सबैभन्दा नजिकको कर्मचारी भनेर चिन्छन् । उनलाई मुकेश अम्बानीको दाहिने हात पनि भनिन्छ । रिलायन्सका सबै सम्झौताको सफलताको पछाडि उनी हुन्छन । वर्षौंदेखि, उनले अथक इमानदारी र समर्पणका साथ कम्पनीको लागि काम गर्दै आएका छन् । मुकेश अम्बानी मात्र नभई उनका छोराछोरी आकाश अम्बानी, अनन्त अम्बानी र ईशा अम्बानी पनि मनोज मोदीको हरेक कुरामा विश्वास गर्छन् । उनको कामको कदर गर्दै अब अम्बानी परिवारले उनलाई अमूल्य उपहार दिएको छ ।

२२ तले भवन उपहार

अम्बानी परिवारले मनोज मोदीका लागि मुम्बईको नेपियन सी रोडमा २२ तले भवन किनेका हुन् । यस सम्पत्तिलाई वृन्दावन नाम दिइएको छ । नेपियन सी रोड मुम्बईको पोश क्षेत्र हो । यहाँ सम्पत्तिको दर रु ४५,१०० देखि भारु ७०,६०० प्रति वर्ग फुटसम्म छ । यो भवनको लागत १ हजार ५ सय करोड रुपैयाँ भारु रहेको बताइएको छ । यो भवन १.७ लाख वर्ग फिट क्षेत्रफलमा बनेको छ ।

मुकेश अम्बानीको दाहिने हात

मनोज मोदी मुकेश अम्बानीका कलेज साथी पनि हुन् । अम्बानी र मोदी दुवै सहपाठी थिए । दुवैले विश्वविद्यालयको केमिकल टेक्नोलोजी विभागबाट सँगै अध्ययन गरेका छन् । पढाइ सकेपछि मुकेश अम्बानीले रिलायन्समा काम गर्न थालेपछि उनले मनोजलाई पनि आफूसँग बोलाए । मनोज मोदी सन् १९८० देखि रिलायन्स इन्डस्ट्रिजसँग आवद्ध छन् । उनी व्यापारमा मात्र नभई अम्बानी परिवारमा पनि सम्मानित छन् । मुकेश अम्बानी आफैले उनको कुरा ध्यान दिएर सुन्छन् । उनी अम्बानी परिवारका छोराछोरीका लागि सल्लाहकारको रूपमा काम गर्छन् । रिलायन्सको सफलताको पछाडि उनको दिमाग रहेको पनि बताइएको छ । रिलायन्समा उनलाई एमएम भनिन्छ ।

सीईओ बराबरको शक्ति

मनोज मोदी रिलायन्स जियो र रिलायन्स रिटेलको निर्देशक पदमा छन् । उनी लाइमलाइटबाट टाढा रहन्छन् । उनी कुनै पनि सामाजिक सञ्जालमा छैनन् । तर कम्पनीले उनको लागि धेरै गर्छ । उनी हजिरा पेट्रोकेमिकल कम्प्लेक्स, जामनगर रिफाइनरी, फस्र्ट टेलिकम बिजनेस, रिलायन्स रिटेल र फोरजी रोलआउट जस्ता विभिन्न परियोजनाहरूसँग सम्बद्ध छन् । कम्पनीमा सीईओको जत्तिकै शक्ति उनीसँग छ । अनुवाद गरिएको