काठमाडौँ । एभरेस्ट बैंकको मुख्य कार्यालयमा कार्यरत दुई जना कर्मचारीमा कोरोना संक्रमण पुष्टि भएको छ । शुक्रबार गरिएको केन्द्रीय कार्यालयका १५२ जना कर्मचारीको पिसिआर परिक्षणमा २ जनाको पोजेटिभ देखिएको बैंकले जनाएको छ।
बैंकले अहिलेको महामारीको बेला ग्राहक र कर्मचारीलाई सुरक्षित बनाउन परिक्षण गरिएको र दुई जनाको पोजेटिभ देखिएको बताउँदै दुवै जनालाई कुनै लक्षण नदेखिएको र उनीहरु अहिले आफ्नै घरमा आइसोलेसनमा पठाइएको जानकारी दिएको छ ।
आइतबार बैंकको केन्द्रीय कार्यालय ‘डिसइन्फेक्टेड’ गरिएको र बैंकले केन्द्रीय कार्यालयबाट दुई दिनका लागि सेवा बन्द गरेको छ । बुधबारदेखि नियमित रुपमा मुख्य कार्यालयबाट सेवा सुचारु हुने बैंकले जनाएको छ ।
मुख्य कार्यालय बन्द भए पनि बैंकको अरु शाखा कार्यालयबाट हुने सेवा नियमित रहेको र कुनै अवरोध नभएको बैंकले जानकारी दिएको छ । बैंकले आउँदा दिनमा बैंकका सबै शाखाका कर्मचारीहरुको पिसिआर परिक्षण गरेर बैंकको सेवा सुरक्षित बनाउने र ग्राहकको सुरक्षालाई प्रथामिकतामा राख्ने गरि बैंकले तयारी अगाडी बढाएको बताएको छ ।
साथै बैंकले दुई दिनका लागि लाजिम्पाटस्थित कार्यालय बन्द भएकाले ग्राहकले आफूलाई पायक पर्ने अर्को शाखाबाट सेवा लिन आग्रह गरेको छ ।
