किसानहरुले गरे बल्खु तरकारी बजारमा अन्तरक्रिया, तरकारीको आपूर्ति नियमित


बिजखबर संवाददाता
2 November, 2015 8:09 pm

काठमाडौं । बल्खु कृषि तथा तरकारी बजारमा ढुवानीको समस्याका वावजूद पनि देशभरिबाट उत्पादित विभिन्न किसिमका तरकारीहरु सुलभरुपमा उपलब्ध भैरहेको छ । कृषि क्षेत्रमा क्रियाशील मुलुकभरका कृषि उद्यमीहरुको अवलोकन भ्रमण टोलीलाई बजारमा स्वागत गर्दै कार्यकारी निर्देशक रामकृष्ण कुँवरले यस बजारको स्थापना भएपछि किसानहरुलाई बजारको अभावसम्वन्धी गुनासो आउन छोडेको जानकारी दिए । ‘आत्मनिर्भर नहुँदा मुलुकले दुख पाइरहेको छ,’ उनले भने, ‘कृषि तथा पशुपालनमा तपाईहरु लाग्नुहोस, उत्पादन गर्नुहोस, हामी तपाईलाई सुपथ बजार उपलब्ध गराउन तयार छौं ।’

FoneLoan-250x250
Yamaha_250X250

उनले निजीक्षेत्रबाट पनि बजार खुल्न थालेकोले अव किसानले उत्पादित बस्तुको मोल पाएनौं भनेर गुनासो गर्ने कुनै ठाउँ रहने बताए । बल्खु कृषि तथा तरकारी बजारमा तरकारी, फलफूल र कृषि उपजदेखि माछामासुको समेत उचित मोलमा विक्री वितरणको व्यवस्था मिलाइएको छ । स्टल राखेर वा त्यहाँका कृषि व्यापारीहरुलाई आफ्नो सामान विक्री गरेर प्रशस्त लाभ लिन सकिन्छ ।

कार्यकारी निर्देशक कुँवरले ढुवानीमा समस्या देखिएपनि अत्यावश्यक खाद्य बस्तु भएकोले तरकारीको आपूर्तिलाई हरतरहले सहज बनाइएको जानकारी दिए । आपूर्ति मात्र होइन, सकेसम्म मूल्यलाई समेत नियन्त्रण गरिएको र महंगोमा बिक्री हुने संभावना भएपनि उपभोक्ताहरुलाई मर्कामा नपार्न व्यापारीहरुसमक्ष आग्रह गरे । बजार भविष्यलाई पनि चाहिने भएकोले यो विषम परिस्थितिको फाइदा नउठाउन भनिएको छ ।

मानवीय दृष्टिले पनि दैनिक अत्यावश्यकीय खाद्य वस्तुहरुको ढुवानीमा समस्या नबनाउन पनि उहाँले आन्दोलनकारीहरुलाई आग्रह गरे ।
कृषि विकास मन्त्रालयले मुलुकभरबाट विभिन्न कृषि तथा पशुपालनका क्षेत्रमा उत्कृष्ठ ठहरिएका किसानहरुलाई विश्व खाद्य दिवसको उपलक्ष्यमा पुरस्कृत गर्ने भएको छ । सोही सिलसिलामा किसानहरु बजारको अवलोकनका लागि बल्खु तरकारी बजारमा आएका थिए । कृषि व्यवसाय तथा बजार विकास निर्देशनालयले आफनो कार्यालय परिसरमै मंगलबार विश्व खाद्य दिवसका अवसरमा पुरस्कार तथा सम्मान वितरण गर्दैछ ।

सहभागी किसानहरुले सामान्य अवस्थामा पनि ढुवानीको समस्या हुने गरेको र किसानहरुले उत्पादित बस्तुको उचित मोल पाउन नसकेको गुनासो गरेका थिए । बजारको विस्तारले आफूहरुलाई कृषि उत्पादन वृद्धितिर लाग्न प्रेरित गरेको जानकारी दिएका थिए । सो अवसरमा उनीहरुले कृषि उपजको मोल, ढुवानी, भण्डारण तथा प्याकेजिङका बारेमा बल्खुका कृषि व्यापारीहरुसँग अन्तक्रिया गरेका थिए ।

प्रतिक्रिया दिनुहोस्