काठमाडौं । सरकारले अन्तरराष्ट्रिय उडानका लागि राख्नुपर्ने नगद धरौटी रकÞममा छुट दिने भएको छ । संस्कृति पर्यटन तथा नागरिक उड्डयन मन्त्रालयका अनुसार अन्तरराष्ट्रिय उडानका लागि राख्नुपर्ने नगद धरौटी दुइ करोडबाट घटाएर एक करोड़ रुपैयाँ कायम गरिएको मन्त्रालयका सचिव केदारबहादुर अधिकारीले जानकारी दिए ।

मन्त्रालयले जारी गरेको नयाँ कार्यविधिमा उक्त धरौटी एक बर्षसम्मको लागि बैंक ग्यारेन्टीमासमेत राख्न सकिने व्यवस्था गरिएको छ । यसले गर्दा वायुसेवा कम्पनीको लागत कम गर्न सहयोग पुग्ने मन्त्रालयको विश्वास रहेको छ ।

अहिले नेपालबाट नेपाली वायुसेवा कम्पनीका रुपमा नेपाल वायुसेवा निगम, हिमालय एयरलाईन्स र बुद्ध एयरले अन्तरराष्ट्रिय उडान गरिरहेका छन । सरकारले हालै मात्र आन्तरिक वायुसेवा प्रदान गरिरहेका कम्पनीलाई अन्तरराष्ट्रिय उडान सञ्चालनका लागि इजाजतपत्र खुला गरेको छ ।

संस्कृति पर्यटन तथा नागरिक उड्ययन मन्त्रालयकोे यही बैशाख १५ गतेको मन्त्रीस्तरीय निर्णयले इजाजतपत्र खुला गर्ने निर्णय गरेको हो । अन्तरराष्ट्रिय हवाई सेवा सञ्चालनका लागि इजाजतपत्र प्रदान गर्ने सम्बन्धी कार्यविधि, २०७५ मा भएको व्यवस्थाबमोजिम शर्त पूरा गरेका कम्पनीलाई इजाजतपत्र उपलब्ध गराउने गरी निर्णय गरिएको छ ।

मन्त्रालयका अनुसार इजाजतपत्र प्राप्त गर्न शर्त पूरा गरेका कम्पनीले बैशाख १५ गतेदेखि गणना हुने गरी ४५ दिनभित्र मन्त्रालयमा आवेदन दिनुपर्नेछ । कम्तिमा पाँच ओटा विमान सञ्चालनको अनुभव हुनुपर्ने, धरौटी, इजाजत दस्तुर र रोयल्टीबापतको रकम तथा अन्य शूल्क कार्यविधिबमोजिम हुने अधिकारीले बताए ।