काठमाडौं । काठमाडौं महानगरको १६ नं. वडाले ५० करोड बराबरको योजना माग गरेको छ । वडामा करीब १ लाख ३० हजार मानिस बस्ने र विभिन्न समस्यामा सोहीअनुसारको आर्थिक खर्च हुने भन्दै उक्त रकम बराबरको योजना कामपासँग माग गरेको हो ।
उक्त वडाका वडाध्यक्ष मुकुन्द रिजालका अनुसार वडामा बसोबार गर्ने मानीसको संख्या झन्डै एक नगरपालिकामा वसोबास गर्ने जनसँख्या बराबर हो । ‘वडाको बिकास माग बार्षिक ५० करोड रुपैयाँ हो,’ उनले भने, ‘यति रकम पठाउन नसकिए पनि कम्तीमा १० करोड रुपैयाँ बढीका योजना चाहिन्छन् नत्र नागरिकका समस्या समाधान गर्न कठिन छ ।’
आइतबार वडा क्षेत्रको पूर्वाधार र सामाजिक क्षेत्रका अवस्था बुझ्न पुगेकी कामपाकी उपप्रमुख हरिप्रभा श्रेष्ठ खड्गीसँग वडाध्यक्ष रिजालले भने, ‘मेरो वडामा ढल जाम भएको खोल्नका लागि मात्र ५० लाख रुपैयाँ भन्दा बढीको माग छ ।’ क्षेत्रपाटी क्षेत्रमा गरिएको ढल सफाइको प्रसङ्ग सुनाउँदै उनले थपे, ‘एक पटकको सफाइमा ढलबाट, ३ ट्रक जमेको बोसो निकालियो । अबस्था आफैं अनुमान लगाउनोस् ।’
महानगरको बर्गीकरणमा यो ठूलो वडामा पर्छ । ठूलो वडा भएकोले वडास्तरीय कार्यक्रम सञ्चालन गर्न महानगरले बार्षिक ३ करोड रुपैयाँ पठाउने गरेको छ । वडाध्यक्षका अनुसार वडाको चरित्र अनुसार यो रकम अपुग हो ।
