काठमाडौं । नेपालको इलेक्ट्रिक सवारी बजारमा प्रतिस्पर्धात्मक मोडलहरू थपिँदै जाँदा, केयी (Kaiyi) इ–क्यूट ०२ एक आकर्षक विकल्पको रूपमा उभिएको छ। नेपालमा केयी गाडीहरूको आधिकारिक वितरक लक्ष्मी ई–मोबिलिटी र जी.ओ. अटोमोबाइल्सले केयी इ–क्यूट ०२ अब केवल रु. २०.९६ लाखमा उपलब्ध गराउने घोषणा गरेका छन्।

यो आक्रामक मूल्य निर्धारणले यसलाई बजारमा उपलब्ध अत्यधिक फिचर–युक्त र किफायती २–ढोके इलेक्ट्रिक सवारीहरूमध्ये एक बनाएको छ। स्टाइल, शक्ति, दक्षता र सुरक्षाको सन्तुलन प्रस्तुत गर्ने इ–क्यूट ०२ दैनिक प्रयोगका लागि उपयुक्त र भविष्यमा केन्द्रित गाडीका रूपमा लिइएको छ।

इ–क्यूट ०२ मा ४० किलोवाटको मोटर र २८.०८ किलोवाट–आवर ब्याट्री जडान गरिएको छ, जसले एक पटकको फुल चार्जमा ३०० किलोमिटरसम्मको रेन्ज दिन सक्छ। रीजेनेरेटिभ ब्रेकिङ प्रणालीले ऊर्जा पुनः संचित गर्दै ब्याट्रीको दक्षता बढाउँछ।

गाडीमा इको+, इको, नर्मल र स्पोर्ट्स गरी चार ड्राइभिङ मोडहरू उपलब्ध छन्, जसले यात्राको प्रकृति अनुसार चालकले मोड चयन गर्न सक्दछन्। केयी इ–क्यूट ०२ मा १०.२५ इन्चको टचस्क्रिन इन्फोटेनमेन्ट सिस्टम, कन्सिल्ड डोर ह्यान्डल, इन्टरमिटेन्ट वाइपर र १५ इन्च टायर जस्ता आधुनिक सुविधाहरू छन्। सेन्सर–आधारित किलेस एन्ट्री, फिजेट स्पिनर शैलीको रिमोट, पुश–बटन स्टार्ट, स्वचालित हेडलाइट र स्टेयरिङमा माउन्ट गरिएको गियर सिफ्टरले प्रयोगमा सहजता प्रदान गर्छ।

यो गाडी ६५ प्रतिशत उच्च–शक्तिको स्टिल केज बडीमा निर्मित छ र यसमा डुअल एयरब्याग, हील असिस्ट कन्ट्रोल, आइसोफिक्स चाइल्ड सिट एन्कर, रियर पार्किङ सेन्सर, र ३६० डिग्री क्यामेरा प्रणाली जडान गरिएको छ। साइड क्यामेरा, ब्लाइन्ड स्पट अलर्ट र एभीएएस जस्ता विशेष सुरक्षात्मक सुविधा पनि समावेश छन्।

इ–क्यूट ०२ देशभरका प्रमुख शहरहरू—नख्खु, थापाथली, बिर्तामोड, नेपालगञ्ज, धनगढी, दाङ, भैरहवा, हेटौंडा, भरतपुर, पोखरा, विराटनगर र वीरगञ्जस्थित आधिकारिक केयी शोरूमहरूमा उपलब्ध रहेको लक्ष्मी ई–मोबिलिटीले जनाएको छ। निर्माताले यो मूल्य रणनीति नेपालमा इलेक्ट्रिक सवारीको प्रवर्द्धन र सहज पहुँच सुनिश्चित गर्ने अभियानको एक हिस्सा भएको स्पष्ट पारेका छन्।