काठमाडौं । गत आर्थिक वर्ष २०८१/८२ सम्म बीमा कम्पनीहरुले सेयर बजारमा करिब ३५ अर्ब रुपैयाँ लगानी गरेका छन् । नेपाल बीमा प्राधिकरणले जारी गरेको पछिल्लो तथ्यांक अनुसार गत आर्थिक वर्षभरीमा बीमा कम्पनीहरुले सूचीकृत कम्पनीको सेयरमा ३४ अर्ब ९४ करोड ४६ लाख रुपैयाँ लगानी गरेका हुन् । यो अघिल्लो वर्षको यसै अवधिको तुलनामा ५२.०२ प्रतिशत अर्थात् ११ अर्ब ९५ करोड ७७ लाख रुपैयाँले बढी हो । अघिल्लो वर्षको यसै अवधिमा यी कम्पनीहरुले २२ अर्ब ९८ करोड ६९ लाख रुपैयाँ सेयरबजारमा लगानी गरेका थिए ।
बीमा कम्पनीहरुले कुल लगानीयोग्य रकमबाट अधिकतम १० प्रतिशत सूचीकृत साधारण सेयरमा लगानी गर्न पाउने नियामकीय व्यवस्था छ । सोही अनुसार लगानी गर्दै आइरहेका छन् । नेपालको सेयर बजारमा बीमा कम्पनीहरु ठूला संस्थागत लगानीकर्ता हुन् । जब सेयर बजारमा संस्थाहरुको लगानी बढ्छ त्यसले समग्रमा पुँजीलाई नै बढाउन सहयोग पुग्छ ।
ठूलो मात्रामा संस्थाहरुले लगानी गर्दा त्यसले बजारलाई समेत स्थायित्व प्रदान गर्दछ । व्यक्तिले जस्तो संस्थागत लगानीकर्ताले छिटोछिटो किनबेच गरिरहँदैनन् । कम्पनीको सेयर मूल्य न्यून विन्दुमा झरेका बेला ठूलो परिमाणमा खरिद गर्छन् । बीमा कम्पनीहरुले बजारमा लगानी ठूलो दरले बढाएका छन् । यो सकारात्मक हो । यसअवधिमा जीवन बीमा कम्पनीले सेयर बजारमा ३० अर्ब ५२ करोड रुपैयाँ लगानी गरेका छन् भने निर्जीवन बीमा कम्पनीले ४ अर्ब ४२ करोड रुपैयाँ लगानी गरेका छन् ।
जीवन बीमा कम्पनीको सेयर बजारमा लगानी ५९.५८ प्रतिशतले बढ्यो
गत आर्थिक वर्षमा पुँजी बजारमा जीवन बीमा कम्पनीहरुको लगानी ५९.५८ प्रतिशतले बढेर ३० अर्ब ५२ करोड २८ लाख रुपैयाँ पुगेको छ । अघिल्लो वर्ष जीवन बीमा कम्पनीहरुले सेयर बजारमा १९ अर्ब १२ करोड ६४ लाख रुपैयाँ लगानी गरेका थिए । सेयर बजारमा सबैभन्दा धेरै लगानी गर्नेमा हिमालयन लाइफ इन्स्योरेन्स रहेको छ । १ वर्षमा यसको सेयर बजारमा लगानी ९१.७१ प्रतिशतले बढेर १० अर्ब ८५ करोड ९७ लाख रुपैयाँ पुगेको छ । १ वर्षमा राष्ट्रिय जीवन बीमा कम्पनी बाहेक अरु सबै कम्पनीको सेयर बजारमा लगानी बढेको छ । यसको सेयर बजारमा लगानी ७४.७० प्रतिशतले घटेर ५४ करोड ६२ लाख रुपैयाँमा आएको छ । मेटलाइफले भने सेयर बजारमा लगानी गरेको छैन ।
निर्जीवन बीमा कम्पनीको लगानी १४.५४ प्रतिशतले बढ्यो
गत आर्थिक वर्षको चौथो त्रैमाससम्म आइपुग्दा निर्जीवन बीमा कम्पनीहरुको सेयर बजारमा लगानी १४.५४ प्रतिशतले बढेर ४ अर्ब ४२ करोड १८ हजार रुपैयाँ पुगेको छ । अघिल्लो वर्षको यसैअवधिमा निर्जीवन बीमा कम्पनीहरुले सेयर बजारमा ३ करोड ८६ लाख ५ हजार रुपैयाँ लगानी गरेका थिए । सबैभन्दा धेरै लगानी गर्नेमा राष्ट्रिय बीमा कम्पनी रहेको छ । यसले सेयर बजारमा ७९ करोड ४१ लाख रुपैयाँ लगानी गरेको छ । त्यस्तै, सगरमाथा लुम्बिनी इन्स्योरेन्सले सेयर बजारमा ७१ करोड ९ लाख रुपैयाँ लगानी गरेको छ । एक वर्षको अवधिमा प्रभु, एनएलजी र नेको इन्स्योरेन्स बाहेक अरु सबैको सेयर बजारमा लगानी बढेको छ ।
