काठमाडौं । नेपाल राष्ट्र बैंकले सहुलियतपूर्ण कर्जासम्बन्धी संशोधित कार्यविधि, २०८२ लागू गरेको छ । केन्द्रिय बैंकले बिहीबार एकिकृति परिपत्र जारी गर्दै नयाँ कार्यविधि कार्यान्वयनमा आएको बताएको हो ।
संशोधित कार्यविधिमा पुँजीकोष अनुपात गणनाका लागि सरकारले उपलब्ध गराउने ब्याज अनुदानलाई शून्य प्रतिशत जोखिमभारको रूपमा राख्न सक्ने प्रावधान गरिएको छ । साथै, बैंकहरूले आफ्ना ऋणीहरूको विवरण त्रैमासिक रूपमा आफ्नै वेबसाइटमार्फत सार्वजनिक गर्नुपर्ने व्यवस्था पनि गरिएको छ ।
सरकारले परम्परागत सीप र पेशाको आधुनिकीकरण, उद्यमशीलता प्रवद्र्धन तथा प्राकृतिक विपद् पीडितको निजी आवास निर्माणलाई लक्षित गर्दै कर्जा सीमा समेत वृद्धि गरेको छ ।
अब कृषि तथा पशुपक्षी कर्जा ५ करोड रुपैयाँसम्म, महिला उद्यमशीलता कर्जा २५ लाख रुपैयाँसम्म, स्टार्टअप र वैदेशिक रोजगारीबाट फर्केकाका स्वरोजगार कर्जा २५ लाख र २० लाख रुपैयाँसम्म उपलब्ध हुनेछन् । प्राकृतिक विपद् पीडितलाई निजी आवास निर्माणका लागि अधिकतम ५ लाख रुपैयाँसम्म सहुलियतपूर्ण कर्जा दिने व्यवस्था गरिएको छ ।
