काठमाडौं । भृकुटी मण्डपमा चलेको अन्तरराष्ट्रिय व्यापार मेला सकिएको छ । ५ दिनसम्म चलेको उक्त मेलामा १ लाख ५० हजार जनाभन्दा बढीले अवलोकन गरेको मेला आयोजक कमिटिले जानकारी दिएको छ ।
मेलामा प्रत्यक्षरुपमा करिव १० करोड रुपैयाँ बरावरको कारोवार भएको अनुमान गरिएको छ । विशेषगरी मेलाबाट चीन तथा भारतका कम्पनीहरुलाई नेपालमा व्यवसायिक सम्बन्ध स्थापना गर्न सहियोग गरेको आयोजकको दावी छ ।
राष्ट्रपतिबाट उद्घाटन भएको उक्त मेलामा, मन्त्री, सभासद्, नेपाल सरकारका उच्चपदस्थ अधिकारीहरु, नेपालमा लागि भारतीय तथा बंगलादेशका राजदुत, उद्यमी व्यवसायीहरु, स्वदेशी एवं विदेशी अवलोकनकर्ताहरुले मेलाको अवलोकन गरेका थिए । आयोजक कमिटिले आगामी वर्षको लागि पनि मेलाको मिति तय गरेको छ । जस अनुसार २०७३ फागुन २४ देखि २८ गते भृकुटीमण्डपमा मेला हुने भएको छ ।
३ सय ५० वटा स्टलहरु रहेको उक्त मेलामा भारत, चीन, पाकिस्तान, वंगलादेशका उत्पादन तथा सेवाहरु प्रदर्शनी गरिएको थियो । मेलामा भारतको ७० वटा, चीनको ९० वटा, पाकिस्तानको २० वटा, वंगलादेशको ५ वटा स्टल रहेका थिए ।
मेलामा हस्तकला, पर्यटन, सूचना प्रविधि, कृषि उत्पादन, उर्जा, भवन तथा निर्माण, शिक्षा, औषधिजन्य, फलाम तथा स्टीलका छुटछुट्टै स्टलहरु रहेका थिए । त्यसैगरी, मेलामा तयारी पोशाक, छाला तथा छालाजन्य उत्पादनहरु, नयाँ प्रविधि तथा उपकरणहरु, खाद्यान्न, फर्निचर, फेसन वेयर, होम डेकोर, सेवा क्षेत्रका विविध स्टलहरु मेलाका आकर्षण रहेका थिए ।
