काठमाडौं । चालु आर्थिक बर्षको साउन महिनामा निर्जीवन बीमा कम्पनीहरुले ४ अर्बभन्दा बढी बीमा शुल्क संकलन गरेका छन् । नेपाल बीमा प्राधिकरणले सार्वजनिक गरेको तथ्यांकअनुसार नेपालमा सञ्चालनमा रहेका १४ निर्जीवन बीमा कम्पनीहरुले ४ अर्ब ३१ करोड ८४ लाख रुपैयाँ कुल बीमा शुल्क संकलन गरेका छन् । चालु आर्थिक वर्षको पहिलो महिनामा सबैभन्दा धेरै कुल बीमा शुल्क संकलन गर्नेमा सगरमाथा लुम्बिनी इन्स्योरेन्स रहेको छ । १ महिनाको अवधिमा यसले ४५ करोड ५४ लाख रुपैयाँ कुल बीमा शुल्क आर्जन गरेको छ ।
त्यस्तै, दोस्रो धेरै कुल बीमा शुल्क संकलन गर्नेमा सिद्धार्थ प्रिमियर इन्स्योरेन्स रहेको छ । यसले कुल ४१ करोड ७९ लाख रुपैयाँ बराबरको बीमा शुल्क आर्जन गरेको छ । यता, शिखर र ओरियन्टल इन्स्योरेन्सले पनि ४१ करोड रुपैयाँभन्दा धेरै कुल बीमा शुल्क संकलन गरेको छ ।
यता, सञ्चालनमा रहेका ४ माइक्रो इन्स्योरेन्सहरुले ७ करोड ८२ लाख रुपैयाँ बराबरको कुल बीमा शुल्क आर्जन गरेका छन् । सबैभन्दा धेरै कुल बीमा शुल्क संकलन गर्नेमा प्रोटेक्टिभ माइक्रो इन्स्योरेन्स रहेको छ । साउन महिनामा यसले २ करोड ८ लाख रुपैयाँ बीमा शुल्क संकलन गरेको छ ।
