काठमाडौं । नेपाल स्टक एक्सचेन्ज (नेप्से)ले अन्तिम १५ मिनेटको भारित औसत मूल्य गणनासम्बन्धी चौतर्फी विरोध भएपछि विज्ञप्ति नै जारी गरेको छ । शुक्रबार नेप्सेले स्वचालित प्रणालीले अन्तिम १५ मिनेटको भारित औसत मूल्यका आधारमा सेयर बजार परिसूचक गणना गर्ने गरेको स्पष्ट पार्दै विज्ञप्ति जारी गरेको हो ।
नियमित कारोबार सत्रमा बिहान ११ बजे बजार खुलेपछि ३ बजेसम्म प्रत्येक कारोबारको कारोबार मूल्यलाई सूचीकृत सेयर संख्याले गुणा गरी नेप्से सूचकांक गणना गरिने नेप्सेले जारी गरेको विज्ञप्तिमा उल्लेख छ । ३ बजेपछि भने नेप्सेको स्वचालित प्रणालीले प्रत्येक कारोबार मूल्य र कारोबार भएका सेयर संख्याबाट भारित औसत मूल्य निकालेर सोका आधारमा नेप्से सूचकांक गणना गर्ने उल्लेख गरेको छ ।
‘स्वचालित कारोबार प्रणालीले पहिलो चरणमा २ः४५ देखि ३ः०० बजेसम्म प्रत्येक कम्पनीक प्रत्येक कारोबार मूल्य र कारोबार सेयर संख्याका आधारमा भारित औसत मूल्य अर्थात अन्तिम मूल्य गणना गर्छ’ नेप्सेले जारी गरेको विज्ञप्तिमा भनिएको छ, ‘स्वचालित कारोबार प्रणालीले दोस्रो चरणमा त्यसरी प्राप्त भारित औसत मूल्यका आधारमा बजार परिसूचक गणना गर्ने गर्छ ।’
यसले नियमित कारोबारमा सूचकांक गणना गर्दा कम्पनीको कारोबार सेयर संख्या प्रभावित नहुने नेप्सेले स्पष्टोक्ति दिएको छ । अपरान्ह ३ः०० बजेपछिको गणनामा कम्पनीको कारोबार सेयर संख्या प्रभावित हुने जनाएको छ ।
