बिजखबर संवाददाता

२ बैशाख, काठमाडौं । आईएमई ग्रूपले नेपाली बजारमा ‘यूएम ग्लोवल’ ब्राण्डका मोटरसाइकल भित्र्याएको छ । आईएमई ग्रूप अन्तरगतको आईएमई अटोमोटिभ्सले ‘ एम ग्लोवल’ यू ब्राण्डका मोटरसाइकल तथा स्कुटर नेपाली बजारमा भित्र्याएको हो ।
यससँगै कम्पनीले नेपाली बजार सुहाउँदो सवै खालका मोटरसाइकल भित्र्याउने भएको छ । जसमध्ये हाल ४ वटा मोडलको मोटरसाइकल भित्र्याइसकेको र केही समय भित्रै अन्य मोडलहरु पनि भित्र्याइने कम्पनीले जानकारी दिएको छ । कम्पनीले आज एक पत्रकार सम्मेलन गरी ४ वटा मोडल सार्वजनिक गरेको थियो ।

सो ब्राण्डका १ सय २५ सीसीदेखि २ सय ३० सीसीसम्मका मोटरसाइकल नेपाली बजारमा उपलब्ध हुनेछ । सामान्य अफिसियल देखि स्पोर्टीसम्मका मोटरसाइकल उपलब्ध गराइने कम्पनीले जानकारी दिएको छ ।

कम्पनीले रेनेगेड सिरिज, एक्ट्रीट सिरिज, इकोनमिक बाइक, पावरम्याक्स, डर्टस् सिरिज तथा मोटार्ड सिरिजका मोटरसाइकल उपलब्ध गराउने भएको छ । यस्तै, क्याफे क्रुजर, क्रुजरहरु, स्कुटरहरु कम्प्युटर सिरिजहरु उपलब्ध हुनेछ । साथै, डर्टस् सिरिजको डीएसआर मोटरसाइकलबाट आफ्नो प्रडक्ट लञ्च गर्ने आईएमई अटोमोटिभ्सका प्रमुख कार्यकारी अधिकृत कपिल सिवाकोटीले बताए । ‘हाल हामीले प्रडक्टको वारेमा जानकारी मात्र दिएका हौं,’ उनले भने, ‘डीएसआर मोडलको बाइक लञ्च गरेर व्यवसायिक रुपमा विक्री शुरु गर्ने छौं ।’

यूएम मोटरसाइकलको मुख्य विशेषतामा डिजाइन र रङ रहने छ । उक्त मोटरसाइकलमा युएसबी चार्ज गर्ने ठाउँ, जेल सिट र छरितो ड्यासबोर्ड रहने छ ।

कम्पनीले उपलब्ध गराएका मोटरसाइकलको बजार मुल्य १ लाख ७२ हजारदेखि ३ लाख ८५ हजार रुपैयाँसम्म रहेको छ । केही समय भित्रै लञ्च गर्ने डीएसआर मोडलको बजार मुल्य भने ३ लाख ५६ हजार रुपैयाँ रहने कम्पनीले जानकारी दिएको छ । आगामी दिनमा नेपाली बजारलाई उपयुक्त हुने खालका कम सीसीका सस्ता मोटरसाइकल समेत उपलब्ध गराइने सिवाकोटीले बताए ।

उनका अनुसार कम्पनीले यो वर्ष प्रोडक्ट सेलभन्दा पनि सेवा विस्तारलाई बढी प्राथमिकता दिने भएको छ । ‘हाम्रो प्रमुख उद्देश्य ग्राहकलाई बढी सन्तुष्टी दिनु हो,’ उनले भने, ‘तसर्थ यस वर्ष डिलर विस्तार तथा सर्भिसिङ सेण्टर स्थापनालाई बढी प्राथमिकता दिएका छौं ।’ यो वर्ष कम्पनीले ४ हजार वटा मोटरसाइकल तथा स्कुटर विक्री गर्ने लक्ष्य लिएको समेत उनले जानकारी दिए ।

हाल कम्पनीले गैरीधारास्थित शोरुमबाट कारोवार शुरु गरेको छ । केही समयभित्रै नाचघर र टेकूमा पनि आफ्नो शोरुम स्थापना गरिने सिवाकोटी बताउँछन् । ‘हामीले देशभर ७६ वटा डिलर विस्तार गर्ने लक्ष्य लिएका छौं,’ उनले भने ।
कार्यक्रमा आईएमई ग्रूपका अध्यक्ष चन्द्रप्रकाश ढकालले नेपालीको रोजाइ अनुसारका मोटरसाइकल आफले नेपाली बजारमा भित्र्याएको बताए । ‘हामीले स्टाइल डिजाइनमा विश्व प्रख्यात अमेरिक मोटरसाइकल नेपाली बजारमा भित्र्याएका छौं,’ उनले भने, ‘जसले नेपालको टू ह्वीलरको बजारलाई अझ शसक्त रुपमा अघि बढाउने छ ।’ यसले नेपालको टू ह्वीलरको बजारमा थप आयाम थप्ने समेत उनले जानकारी दिए ।

यस्तै, युएम इण्टरनेशनल एलएलसि अमेरिकाका विजनेश डेभलपमेन्ट डाइरेक्टर हुवान् भिल्लेगासले आइएमई र यूएमबीच भएको यस साझेदारीले आफुलाई खुशी लागेको बताए । ‘यो साझेदारीसँग नेपालीले रेनेगन, कमाण्डोजस्ता बहुचर्चित मोडलहरु हाक्न पाउनेछन्,’ उनले भने, ‘साथै, केही समयभित्रै सो ब्राण्डका मोटरसाइकले नेपाली बजारमो ठूलो हिस्सा ओगट्नेछ ।’

सन् २०१५ भित्र १७ वटै मोडल भित्र्इने

कम्पनीले सन् २०१७ भित्रै यूएम ग्लोवलको सवै मोडलका मोटर नेपाली बजारमा भित्र्याउने भएको छ । हाल धेरै जसो मोडलहरु नेपाल भित्रिसकेको र क्रमश लञ्च गर्दै जाने कम्पनीेको भनाइ छ । ‘हामीले नेपालका मोटरसाइलका पारखीहरुको चाहना अनुसारका मोटरसाइकल बजारमा ल्याउन लागेका छौं,’ उनले भने । साथै, दशै तिहारलाई लक्षित गरी भने धेरै मोडलका मोटरसाइकल लञ्च गर्ने कम्पनीले जानकारी दिएको छ ।

स्कुटीमा स्मार्ट हेलमेट

कम्पनीले स्कुटरमा स्मार्ट हेलमेट उपलब्ध गराउने भएको छ । जसको सहायता स्कुटर चलाउँदा पनि अटोमोटिक रुपमा मोवाइलमा कुरा गर्न सकिनेछ । ‘स्मार्ट हेलमेट मार्फत मोवाइलमा कुरा गर्नका लागि स्कुटरको ह्यान्डीलमा डिजिटल स्क्रिन जडान गरिएको हुन्छ,’ उनले भने, ‘कुन नम्वरबाट फोन आएको छ स्क्रिन हेरेर आफुलाई आवश्यक परेका फोन सोही स्क्रिनबाट उठाएर ब्लूटुथको सहायताबाट हेलमेटबाटै कुरा गर्न सकिनेछ ।’ साथै, यस्तो खालको हेमलेट नेपालमै आफुहरुले पहिलो पटक भित्र्याउन लागिएको सिवाकोटीले बताए ।