काठमाडौं । विश्व बैंकले आगामी आर्थिक बर्ष नेपालको आर्थिक वृद्धिदर ओरालो लाग्ने जानकारी दिएको छ । सरकारले आर्थिक वृद्धिदर बढाउने लक्ष्य लिईरहेको बेला विश्व बैंकले सन २०२० मा नेपालको आर्थिक बृद्धिदर ६ दशमलव ४ प्रतिशतमै सिमित रहने प्रक्षेपण गरेको हो ।
नेपालले चालु आर्थिक बर्षको अन्त्यसम्म ८ दशमलव ५ प्रतिशत आर्थिक वृद्धिको लक्ष्य राखेको छ । यता विश्व बैंकले भने आगामी लगातार २ बर्ष नेपालको आर्थिक वृद्धिदर घटेर क्रमशः ६ दशमलव ४ र ६ दशमलव ५ प्रतिशत पुग्ने प्रक्षेपण गरेको हो ।
विश्व बैंकले ‘नेपाल डेभलपमेन्ट अपडेट २०१९’ प्रतिवेदन सार्वजनिक गर्दै चालु बर्ष भने नेपालको आर्थिक वृद्धिदर ७ दशमलव १ प्रतिशत पुगेको जानकारी दिएको छ । विश्व बैंकले नेपालमा मनसुनको कमी र कृषि क्षेत्रमा खस्किदो उत्पादनले आगामी बर्ष आर्थिक वृद्धिदर घट्ने प्रक्षेपण गरेको हो ।
प्रतिवेदन सार्वजनिक गर्दै अर्थमन्त्री युवराज खतिवडाले नेपालले आगामी आर्थिक बर्षसम्म ८ दशमलव ५ प्रतिशत आर्थिक वृद्धि पुर्याउने लक्ष्य लिएको बताएका छन । उनले प्रविधिको पहुँच हुँदाहुँदै पनि अनुमानको भरमा तथ्याङ्क बनाउनाले विश्व बैंककै कतिपय तथ्याङ्कहरुमा त्रुटि हुने गरेको बताएका छन । नेपालमा अझै पनि अनुमानकै आधारमा तथ्याङ बनाउने गरिएको उनको भनाई थियो ।
