रामराजा श्रेष्ठ
२० जेठ, काठमाडौं । ग्याँस बुलेट चलाउने भारतीय ड्राइभरहरु हड्तालमा उत्रिएपछि विरगञ्ज नाकाबाट नेपालमा ग्याँस भित्रन बन्द भएको छ । विगत १ हप्तादेखि ग्याँसको बुलेट गाडी चलाउने भारतीय ड्राइभरहरु हड्तालमा उत्रिएपछि उक्त नाकाबाट नेपालमा ग्याँस आउन नसकेको नेपाल एलपी ग्याँस उद्योग संघका महासचिव कुशप्रसाद मल्लीले बताए । ‘हाल विरगञ्ज नाकामा ८० भन्दा बढी बुलेटहरु आएर थन्किएका छन्,’ उनले भने, ‘तत्काल उक्त नाकाबाट सहज रुपमा ग्याँस नआए अभाव हुनेछ ।’
नेपालमा सवैभन्दा बढी ग्याँस विरगञ्ज नाकाबाट भित्रने गरेको छ । सोही नाकामा भारतीय ड्राइभरहरुले हड्ताल गरेपछि बजारमा समस्या उत्पन्न हुन लागेको समेत उनले जानकारी दिए । ‘हाल उपत्यका वाहिर त सहज रुपमा ग्याँस पाइरहेको छ,’ उनले भने, ‘तर, राजधानीमा भने ग्याँसको अभाव देखिन थालिसकेको छ ।’ उक्त नाकाबाट नेपाल भित्रने ६० प्रतिशतभन्दा बढी ग्याँस आउने गरेको छ । हाल जोगवनी, सुनौली नाकाबाट भने ग्याँस आइरहेको छ ।
विरगञ्ज नाकाबाट ग्याँस नआएपछि त्यसको असर १ महिना पछि मात्र बजारमा देखिने उनले जानकारी दिए । हाल बजारमा पुरानै स्टकमा भएको ग्याँस विक्री भइरहेको र उक्त ग्याँस सकिएपछि ग्याँसको समस्या हुने समेत उनको भनाइ छ ।
झण्डै १ महिना अघि बाबा ग्याँस बोकेर आएको भारतीय बुलेट गाडीले हेटौडामा मोटरसाइकलाई ठक्कर दिँदा मोटरसाइकल चालकको मृत्यु भएको थियो । सोही घटानालाई लिएर प्रहरीले भारतीय ड्राइभरलाई नियन्त्रणमा लिएर राखेको छ । सोही घटानालाई लिएर भारतीय ड्राइभरले रिहाइको माग गर्दै हड्तालमा उत्रिएका हुन् । हाल मोटरसाइकल चलाउने ड्राइभर विरुद्ध अदालतमा मुद्दा दायर भएको छ ।
यता नेपाल आयाल निगमका प्रवक्ता मुकुन्द घिमिरले भने तत्कालै समस्या समाधान हुने बताउँछन् । ‘आज पनि पक्ष र प्रतिपक्षबीच समस्या समाधानका लागि छलफल भइरहेको छ,’ उनले भने, ‘यस विषयमा आजै टुङ्गो लाग्न सक्ने सम्भावना छ ।’ हाल पुरानो ग्याँस स्टकमा रहेको तथा उपत्यकाका धेरै जसो उपभोक्ताहरु वाहिर गएकाले विरगञ्ज नाकामा हड्ताल भएपनि बजारमा तत्काल ग्याँस अभाव नभएको उनले जानकारी दिए ।
