काठमाडौं । नेपालले पहिलोपटक आफ्नै प्रयासमा सगरमाथामा जम्मा हुने फोहोर संकलन गर्ने तयारी गरेको छ । यसअघि विदेशी संघसंस्था तथा व्यक्तिगत रुपमा स्वयम्सेवाको रुपमा फोहोर संकलन हुँदै आएकोमा यस बर्ष संयुक्त रुपमा संकलनको काम हुन लागेको हो । निजी क्षेत्रका विभिन्न संघसंस्थासहित सरकारको सहभागितामा संकलन गर्न लागिएको हो ।
सगरमाथाको फोहोर संकलनमा संस्कृति, पर्यटन तथा नागरिक उड्ययन मन्त्रालय, नेपाली सेना, नेपाल पर्वतारोहण संघ, नेपाल पर्यटन बोर्ड, पर्यटन विभाग, बन तथा वातावरण मन्त्रालयले संयुक्त रुपमा काम गर्नेछन् । त्यस्तै सगरमाथा राष्ट्रिय निकुञ्ज, वातवरण विभाग, खुम्बु पासाङ ल्हामु गाउँपालिका तथा सगरमाथा पोलुशन कन्ट्रोल कमिटि समेत यो काममा सहभागी हुने पर्यटन विभागका महानिर्देशक डण्डुराज घिमिरेले जानकारी दिए ।
फोहोर संकलनको टोलीलाई सघाउन १२ जना शेर्पाहरु समेत खटाउने तयारी छ । उक्त टोलीले सगरमाथाको दोस्रो क्याम्पसम्मको फोहोर संकलन गर्नेछ । उक्त टोली बिहीबार काठमाडौंबाट सगरमाथाको आधार शिविर तर्फ लाग्ने नेपाल पर्वतारोहण संघका अध्यक्ष सन्तविर लामाले बताए । उनका अनुसार फोहोर संकलनको मुख्य शेर्पा टोलीले रुलिङ गर्दै बेस क्याम्प भन्दा माथीको फोहोर संकलन गर्ने र आधार शिविरसम्म ल्याउने काम गर्ने छ ।
आधार शिविरसम्म ल्याइएको फोहोरलाई मजदुरको सहयोगमा गोरख सेपसम्म ल्याउने र त्यहाँबाट ल्याएको फोहोरलाई सेनाको हेलिकप्टरबाट नाम्चेबजार ल्याइने लामाले जानकारी दिए ।आधार शिविरदेखि संकलन क्षेत्रसम्मको फोहोरको तौल करिब १० टन हुने अनुमान गरिएको छ । संकलित फोहोरमध्ये बिसर्जन गर्न मिल्नेलाई त्यतै र बाँकीलाई मात्रै काठमाडौं ल्याइने छ ।
शेर्पाको समुहले आरोहणको मुख्य समय समाप्त हुँदासम्म फोहोर संकलन गर्नेछन् । मे २९ मा नाम्चेमै सगरमाथा दिवस मनाउने र त्यसपछि उक्त फोहोर काठमाडौं ल्याउने कार्यक्रम रहेको लामाले जानकारी दिए ।
उनका अनुसार अहिले बेस क्याम्पभन्दा माथी रहेको फोहोर मात्रै संकलन गर्ने र संकलन भएको उक्त फोहोरलाई काठमाडौंमा ल्याएर जुन ५ मा वातावरण दिवसको अवसरमा बिसर्जन गरिनेछ ।
सगरमाथा क्षेत्रमा हुने फोहोरलाई लिएर अन्तराष्ट्रिय रुपमा नेपालको बारम्बार गलत प्रचार हुने गरेको छ । सगरमाथाको फोहोरसहितको तस्विर विभिन्न सञ्चार माध्यममा प्रकाशन तथा प्रसारण गरेर नेपालको बदनामीको प्रयास गराइएको सरोकारवालाको भनाई छ । फोहोर संकलनको अभियानलाई संयुक्त प्रयासमै निरन्तरता दिने योजना रहेको छ ।
