काठमाडौं । एनसेलको सेयर विक्री रोक्न उच्च अदालत पाटनले अल्पकालिन आदेश जारी गरेको छ । अदालतले बिहीबार कम्पनी रजिस्ट्रार कार्यालयका नाममा अल्पकालीन अन्तरिम आदेश जारी गरेको हो ।
उच्च अदालत पाटनका न्यायाधीश पुरुषोत्तम प्रसाद ढकालको इजलासले खरिद बिक्री भएका एनसेलका सेयरहरु २५ मंसिरसम्म दर्ता किताबमा दर्ता नगर्नु नगराउनु भनी कम्पनी रजिस्ट्रारको कार्यालयका नाममा अल्पकालीन अन्तरिम आदेश दिएको हो । यस्तै अदालतले दुबै पक्षलाई २५ मंसिरमा छलफलमासमेत बोलाएको छ ।
गत हप्तामात्रै एनसेलको सतीशलाल आचार्यको कम्पनी स्पेट्रलाईट युकेलाई विक्री गरेको कुरा बाहिर आएको थियो । यसअघि एनसेलको सबैभन्दा बढी ८० प्रतिशत सेयर अजियाटासँग थियो । उक्त सेयर साढे ६ अर्ब रुपैयाँमा बेच्ने गरी अजियाटाले स्पेट्रलाईट युकेसँग एसपीए गरेको थियो ।
यसरी साढे ६ अर्बमा सेयर बेचेपछि करछली भएको भन्दै गोकुल रोकायाले उच्च अदालतमा रिट दर्ता गरेका थिए ।
