काठमाडौं । विश्वका धनीहरुको सूचीमा सबैभन्दा ठूलो उथलपुथल देखिएको छ । लामो समयदेखि टेस्लाका सीईओ एलोन मस्क विश्वको सबैभन्दा धनी व्यक्तिको सिंहासनमा थिए तर सोमबार उनलाई ठूलो झट्का लागेको छ । उनको कुल सम्पत्ति १७.६ बिलियन डलरले घट्यो र उनी दोस्रो स्थानमा पुगेका छन् । अमेजनका संस्थापक जेफ बेजोसले उनलाई पछि पार्दै पहिलो नम्बरमा पुगेका छन् ।
ब्लूमबर्ग बिलियनेर्स इन्डेक्सका अनुसार बेजोस २०० अर्ब डलरको सम्पत्तिका साथ विश्वको सबैभन्दा धनी व्यक्ति बनेका छन् भने मस्क १९८ अर्ब डलरको सम्पत्तिसहित दोस्रो स्थानमा झरेका छन् । यस वर्ष बेजोसको कुल सम्पत्ति २३.४ बिलियन डलरले बढेको छ भने मस्कको कुल सम्पत्ति ३१.३ बिलियन डलरले घटेको छ । मस्कले एलभीएमएच सीईओ र फ्रान्सेली व्यापारी बर्नार्ड अर्नाल्टलाई हराएर मे २०२३ मा नम्बर एक स्थान हासिल गरेका थिए । टेस्लाको सेयर सोमबार सात प्रतिशतभन्दा बढीले घटेको छ ।
अर्नाल्ट हाल १९७ अर्ब डलरको सम्पत्तिसहित धनीहरूको सूचीमा तेस्रो स्थानमा छ । सोमबार, उनको कुल सम्पत्ति १.८४ बिलियन डलरले घट्यो । तर, यो वर्ष उनको कुल सम्पत्ति १८.३ अर्ब डलरले बढेको छ । फेसबुकको मूल कम्पनी मेटा प्लेटफर्मका सीईओ मार्क जुकरबर्ग १७९ अर्ब डलरको सम्पत्तिका साथ विश्वका धनी व्यक्तिको सूचीमा चौथो स्थानमा छन् । यो वर्ष उनको कुल सम्पत्ति सबैभन्दा बढी ५०.७ बिलियन डलरले बढेको छ । माइक्रोसफ्टका संस्थापक बिल गेट्स १५० अर्ब डलरसहित यो सूचीमा पाँचौं स्थानमा छन् । यो वर्ष उनको कुल सम्पत्ति ८.८८ बिलियन डलरले बढेको छ ।
विश्वका धनीहरुको सूचीमा ९ जना अमेरिकाका छन् । स्टिभ बाल्मर १४३ अर्ब डलरसहित यो सूचीमा छैटौं स्थानमा छन् । अमेरिकाका दिग्गज लगानीकर्ता वारेन बफेट १३३ अर्ब डलरसहित सातौं स्थानमा छन् । ल्यारी एलिसन (१२९ बिलियन डलर) आठौं, ल्यारी पेज (१२२ बिलियन डलर) नवौं र सेर्गेई ब्रिन (११६ बिलियन डलर) दशौंमा छन् ।
भारत र एशियाका सबैभन्दा धनी व्यक्ति मुकेश अम्बानी ११५ अर्ब डलरको साथ यो सूचीमा ११ नम्बरमा छन् । सोमबार, उनको कुल सम्पत्ति १.२४ बिलियन डलरले बढ्यो । यस वर्ष उनको कुल सम्पत्ति १८.२ बिलियनले बढेको छ । अदानी समूहका अध्यक्ष गौतम अडानी १०४ बिलियन डलरको कुल सम्पत्तिका साथ १२ नम्बरमा अम्बानीभन्दा एक स्थान तल छन् । यो वर्ष उनको कुल सम्पत्ति १९.२ अर्ब डलरले बढेको छ । अनुवाद
