GBIME

३९ बीमा कम्पनीद्धारा एक महिनामा २४ अर्ब १७ करोड बीमाशुल्क आर्जन, बीमालेख विक्री पनि बढ्यो


बिजखबर संवाददाता
14 August, 2022 11:47 am

insurance company

काठमाडौं । नेपालमा संचालित बीमा कम्पनीहरुले एक महिनाको अवधिमा २४ अर्ब बढी बीमाशुल्क आर्जन गरेका छन् । बीमा समितिका अनुसार १९ जीवन र २० निर्जीवन गरी ३९ बीमा कम्पनीहरुले गएको असार महिनामा २४ अर्ब १७ करोड ३५ लाख रुपैयाँ बीमाशुल्क आर्जन गरेका हुन् ।

NLIC
Lamxi_bank

समितिले सार्वजनिक गरेको तथ्यांकअनुसार गत जेठ मसान्तसम्म सबै बीमा कम्पनीहरुले १ खर्ब ५३ अर्ब ६३ करोड रुपैयाँ बराबरको बीमाशुल्क आर्जन गरेका थिए । तर, एक महिनाको अवधिमै उक्त अर्थात असार मसान्तसम्म बीमा शुल्क संकलन बढेर १ खर्ब ७७ अर्ब ८१ करोड रुपैयाँ पुगेको हो ।

आर्थिक बर्षको अन्तिम महिना भएकाले धेरैजसो बीमा कम्पनीहरुले बिमितबाट यसै अवधिमा प्रिमियम उठाउने गर्दछन् । जसका कारण असार महिनामा मात्रै कम्पनीहरुले उक्त बीमाशुल्क आर्जन गरेको बीमा समितिका एक अधिकारीले बताए ।

असार महिनामा निर्जीबन बीमा कम्पनीहरुले ५ अर्ब रुपैयाँ बीमाशुल्क आर्जन गर्दा जीबन बीमा कम्पनीहरुले १९ अर्ब १६ करोड २३ लाख रुपैयाँ बीमाशुल्क आर्जन गरेका छन् । यसअनुसार निर्जीबन बीमा कम्पनीहरुले असार मसान्तसम्म ३९ अर्ब १६ करोड ९९ लाख रुपैयाँ शुल्क आर्जन गर्दा जीबन बीमा कम्पनीहरुले यस अवधिसम्म १ खर्ब ३८ करोड ६४ लाख रुपैयाँ आर्जन गरेका हुन् ।

यस्तै असार महिनामा मात्रै जीबन र निर्जीवन बीमा कम्पनीहरुले क्रमशः ४ लाख ६७ हजार र ४ लाख ३९ हजार ओटा बीमालेख विक्री गरेका छन् । तर, असार मसान्तसम्म दुबै प्रकारका कम्पनीहरुले क्रमशः १ करोड ३० लाख ९९ हजार र २७ लाख ८८ हजार बीमालेख विक्री गरेका छन् ।

एक बर्षमा ५२ प्रतिशतको वृद्धि

बीमा समितिका अनुसार जीवन बीमा कम्पनीहरुले एक बर्षको अवधिमा बीमालेख विक्री ५२ प्रतिशतले बढाएका छन् । बीमाप्रतिका बढ्दो मोहका कारण एक बर्षको अवधिमै जीबन बीमा कम्पनीहरुले १ करोड ३० लाख ९९ हजार ६ सय ३२ बीमालेख विक्री गरेका छन् । यो अघिल्लो आर्थिक बर्षको यहि अवधिको तुलनामा ५२ प्रतिशतले बढी हो ।

अघिल्लो आर्थिक बर्ष यहि अवधिसम्म सबै जीबन बीमा कम्पनीहरुले ८६ लाख १२ हजार ८ सय ८५ ओटा बीमालेख मात्रै विक्री गरेका थिए । यस्तै यस अवधिमा निर्जीबन बीमा कम्पनीहरुले भने जम्मा २ प्रतिशतले बीमालेख विक्री बढाएको बीमा समितिले जानकारी दिएको छ । समितिको तथ्यांक अनुसार गत आर्थिक बर्षभरी २७ लाख ८८ हजार बीमालेख जारी गरेका छन् । अघिल्लो आर्थिक बर्ष यस्तो संख्या २७ लाख ३१ हजार ७ सय ७३ थियो ।

बीमाशुल्क संकलनलाई हेर्दा एक बर्षको अवधिमा जीबन बीमा कम्पनीहरुले आफ्नो संकलन १४ प्रतिशतले बढाउँदा निर्जीबन बीमा कम्पनीहरुले भने २३ प्रतिशतले बढाएका छन् । गत आर्थिक बर्षको असार मसान्तसम्म ४१ प्रतिशत नेपालीसम्म बीमाको दायरा पुगेको बीमा समितिले जानकारी दिएको छ । अघिल्लो आर्थिक बर्षको असार मसान्तसम्म बीमाको दायरामा पुगेको नेपालीको संख्या २७ प्रतिशत मात्रै थियो ।

प्रतिक्रिया दिनुहोस्

CIVIL
NCHL