काठमाडौं । प्रधानमन्त्री केपी शर्मा ओलीले पाँच दिने औपचारिक चीन भ्रमणका बारेमा शुक्रबार संसदलाई जानकारी गराएका हुन् । चीनका राष्ट्रपति सी चिनफिङको निमन्त्रणामा भदौ १४ देखि १८ गतेसम्म (सन् २०२५ अगष्ट ३० देखि सेप्टेम्बर ३) ओलीले नेपाली प्रतिनिधिमण्डलको नेतृत्व गर्दै चीन भ्रमण गर्ने कार्यक्रम रहेको छ ।
भ्रमणको मुख्य उद्देश्य चीनको थियानजिनमा आयोजना हुने शाङ्घाई सहयोग संगठन (एससिओ) को शिखर सम्मेलनमा सहभागी हुनु रहेको प्रधानमन्त्रीले संघीय संसदमा जानकारी गराएका हुन्। चीन, रूस, भारत, पाकिस्तानसहित १० वटा मुलुक सदस्य रहेको एससिओमा नेपाल सन् २०१६ देखि संवाद साझेदार रहँदै आएको छ ।
भ्रमणका क्रममा प्रधानमन्त्री ओलीले चीनका राष्ट्रपति सी चिनफिङ र उपराष्ट्रपति हान चङ्गसँग छुट्टाछुट्टै भेटवार्ता गर्नेछन् । साथै राष्ट्रपति र उपराष्ट्रपतिले आयोजना गर्ने रात्रिभोजमा पनि उनी सहभागी हुने कार्यक्रम छ ।
भदौ १६ गते हुने एससिओ प्लस शिखर सम्मेलनमा प्रधानमन्त्री ओलीले सम्बोधन गर्नेछन् । सो अवसरमा उनले रूसका राष्ट्रपति भ्लादिमीर पुटिन, माल्दिभ्सका राष्ट्रपति डा। मोहमद मिज्जु, कम्बोडियाका प्रधानमन्त्री डा सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग द्विपक्षीय भेट गर्ने तय भएको छ ।
भ्रमणको अन्तिम दिन भदौ १८ गते (सेप्टेम्बर ३) ओलीसहित नेपाली प्रतिनिधिमण्डलले बेइजिङमा चीन सरकारले आयोजना गर्ने फासिवादविरुद्धको विश्वयुद्ध र जापानी अतिक्रमणविरुद्धको प्रतिरोधी युद्धमा विजय प्राप्तिको ८०औं वार्षिकोत्सव समारोहमा सहभागी हुनेछन् । सो समारोहमा ५० भन्दा बढी देशका प्रतिनिधिहरू सहभागी हुने चीन सरकारले जनाएको छ ।
प्रधानमन्त्री ओलीले यस भ्रमणले नेपाल–चीन मैत्रीपूर्ण सम्बन्ध सुदृढ गर्ने र अन्तरराष्ट्रिय मञ्चमा नेपालको छवि अभिवृद्धि हुने विश्वास व्यक्त गरेका छन् । भ्रमण दलमा उनकी धर्मपत्नी राधिका शाक्य, पूर्व उपप्रधानमन्त्री पूर्णबहादुर खड्का, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, प्रधानमन्त्रीका सल्लाहकार डा. युवराज खतिवडा, सांसद छबिलाल विश्वकर्मा तथा उच्च सरकारी अधिकारीहरू सहभागी रहेका छन् ।
