काठमाडौं । विभिन्न सरकारी कार्यालयदेखि बैंकहरुका कागजात नक्कली बनाउने गरेको आरोपमा एक जना पक्राउ परेका छन् । पक्राउ पर्नेमा झापाको धरमपुर घर भएका ५२ वर्षीय सफराज खड्का छन् । उनलाई केन्द्रीय अनुसन्धान ब्यूरो (सीआईबी)को टोलीले असार ३१ गते महाराजगञ्जबाट पक्राउ गरेको हो ।
पक्राउ परेका खड्कामाथि लिखतसम्बन्धी कसुरमा काठमाडौं जिल्ला अदालतबाट ५ दिनको म्याद लिएर अनुसन्धान अघि बढाइएको छ । उनले विभिन्न सरकारी कार्यालयहरु, अदालत, शैक्षिक संस्था, बैंक तथा वित्तिय संस्थाका कागजातहरु नक्कली बनाउने गरेको पाइएको सीआईबीले जनाएको छ ।
उनीबाट टियुदेखि सीटीइभीटी, एचएसईबी, एनईबीको होलोग्राम समेत बरामद भएको छ । बैंकहरुका रबर स्ट्याम्प शैक्षिक संस्थाको प्रमाणपत्रहरु पनि बरामद भएका छन् । प्रहरी, नापी, वडा, कर कार्यालयदेखि राजनैतिक दलका कागजात समेत उनले नक्कली बनाउने गरेको पाइएको छ । विगत दुई वर्षदेखि उनले नक्कली कागजात बनाउने गरेको सीआईबीको कार्यालयले जनाएको छ ।