काठमाडौं । सरकारले यो बर्ष हीमाली तथा उच्च पहाडी जिल्लामा नुन ढुवानी गर्न १७ करोड ४१ लाख ६० हजार रुपैयाँ खर्च गरेको छ । देशभरका सबै स्थानमा कम मूल्यमा नुन वितरण गर्नका लागि ढुवानी खर्चवापत उक्त अनुदान साल्ट ट्रेडिङलाई सरकारले दिएको हो ।
२०५९ सालमा यातायातको सुविधा नपुगेका २२ जिल्लामा नुन ढुवानी गर्न उक्त अनुदान दिँदै आएपनि हालसम्म धेरैजसो जिल्लामा यातायातको सुविधा पुगेपनि अनुदानको रकममा भने फेरबदल भएको छैन ।
महालेखा परिक्षकको ५९ औं प्रतिवेदनले यातायातका सुविधा पुगिसकेका जिल्लाहरुमा दिईने अनुदान पुनरावलोकन गर्नुपर्ने बताएको छ । हाल सोलुखुम्बु, अछाम, रुकुम, दार्चुला, जाजरकोटलगायतका जिल्लामा यातायातको पहुँच पुगिसकेको छ ।
तर, यस्ता जिल्लामा दिने गरिएको अनुदानमा पुनरावलोकन गरिएको छैन । साल्ट ट्रेडिङले यो बर्ष ९३ हजार ९ सय ८४ क्विन्टल नुन ढुवानी गरेको छ ।
