काठमाडौँ । विश्व स्वास्थ्य संगठन (डब्लुएचओ) ले पछिल्लो २४ घण्टामा विश्वभर २ लाख ६० हजार कोरोना संक्रमित पुष्टि भएको बताएको छ । यो संख्या कोरोना महामारी शुरु भएदेखि अहिलेसम्म एकै दिन संक्रमित हुनेको सबै भन्दा ठुलो संख्या हो ।
संगठनले पहिलो पटक संक्रमितको संख्या एकै दिन साढे २ लाख नाघेको बताएको छ । सबैभन्दा धेरै संक्रमण अमेरिका, ब्राजिल, भारत र दक्षिण अफ्रीकामा देखिएको छ ।
संगठनका अनुसार पछिल्लो २४ घण्टामा अमेरिकामा ७१ हजार ४८४ संक्रमित भएका छन् भने ब्राजिलमा ४५ हजार ४०३, भारतमा ३४ हजार ८८४ रहेका छन् । त्यस्तै दक्षिण अफ्रिकामा १३ हाजर २८५ जना संक्रमित भएका छन् ।
त्यस्तै पछिल्लो २४ घण्टामा विश्वभर ७ हजार ३६० जनाको मृत्यु भएको छ । यो पछिल्लो १० दिनमा एकै दिनमा मृत्यु हुनेको धेरै संख्या हो । विश्वभर अहिलेसम्म एक करोड ४४ लाख १४ हजार २७४ जना संक्रमित भएका छन् । त्यस्तै विश्वभर अहिलेसम्म ६ लाख ४ हाजर १५१ जनाको मृत्यु भएको छ भने अहिलेसम्म ८६ लाख ६ हजार ६११ जना ठिक भएका छन् ।
