चीनले नेपालमा पेट्रोलियम पदार्थ निर्यात गर्नेबारे एक प्रारम्भिक समझदारी पत्रमा हस्ताक्षर गरेपछि नेपालको राजनितीक स्थिरताका लागि भारतसँग पनि मित्रवत छलफल गर्ने बताएको छ । तराईमा विद्यमान अशान्ति र त्यसैलाई कारण देखाएर भारतले गरेको नाकाबन्दीका कारण नेपाल संकटमा परेका बेला चीनको यस्तो धारणा आएको हो ।
‘भारत र नेपाल दुबै चीनका मित्रवत् छिमेकी हुन्’ चीनको परराष्ट्र मन्त्रालयका प्रवक्ता लु काङलाई उद्धृत गर्दै भारतको राष्ट्रिय समाचार संस्था ‘प्रेस ट्रस्ट अफ इन्डिया’ (पिटिआई) लेखेको छ, ‘मुलुकहरुबीचको आपसी सम्बन्ध र क्षत्रीय स्थायित्व कायम गर्न सम्बन्धित सबै राष्ट्रहरु एकैठाउँमा बसेर छलफल गर्न सकिन्छ र त्यसबाट सहमतिमा पुग्न सकिन्छ भन्नेमा हामी आशावादी छौं ।’
नेपालमा जारीे राजनीतिक संकटका सम्बन्धमा बेइजिङ र नयाँदिल्लीबीच पर्दापछाडि कुनै किसिमको वार्ता हुँदैछ कि छैन भन्ने पत्रकारहरूको प्रश्नको जवाफमा काङले यस्तो बताएका हुन् ।
नेपालले पेट्रोलियम आपूर्तिमा इण्डियन आयल कर्पोरेशनको चार दशक लामो एकाधिकार तोड्दै चीनबाट समेत इन्धन आयात गर्न बुधबार बेइजिङमा द्विपक्षीय समझदारीपत्र हस्ताक्षर गरेको थियो । प्रवक्ता काङले नयाँ संविधान जारी भएपछि देखिएको आन्तरिक समस्याको व्यवस्थापन गर्न नेपाल स्वयम् सक्षम हुने आशा व्यक्त गरेको पनि पीटीआईले लेखेको छ ।
बुधवार बेइजिङमा छोटो प्रेस ब्रिफिपङलाई सम्बोधन गर्र्दै प्रवक्ता काङले नेपालको अनुरोधलाई चीनले सकेसम्म पूरा गर्ने प्रतिबद्धता जनाएका थिए । पत्रकारहरुले ‘भारतीय मुलका मधेशीहरुले नयाँ संविधानको विरोध चर्काइरहेको बेलामा चीनले आपूर्ति शुरू गर्छ त ?’ भन्ने प्रश्न गरेपछि काङले यस्तो बताएका थिए ।
