रक्षा रेग्मी
६ असार,काठमाडौं । त्रिभुवन अन्तरराष्ट्रिय विमानस्थलमा नयाँ हेलिप्याड बन्ने भएको छ । हेलिप्याड बनाउनका लागि घास काट्ने तथा साइड सफा गर्ने काम भइरहेको विमानस्थलका महानिर्देशक वीरेन्द्र श्रेष्ठले बताए । ‘ सरसफाइको काम सकिए लगतै हेलिप्याड निर्माण कार्य शुरु गर्ने छौं’ उनले भने ।
विमानस्थलको स्तरोन्नती गर्ने क्रममा हेलिप्याड थप्न लागिएको उनले जानकारी दिए ।
अब बन्ने हेलिप्याडको लम्बाइ ८५ मिटर र चौडाइ ५५ मिटरको हुने छ । सो हेलिप्याडमा १३ ओटा हेलिकप्टर अटाउने बताइएको छ । श्रेष्ठका अनुसार हाल त्रिभुवन विमानस्थलको हेलिप्याडमा १२ ओटा हेलिकप्टर अटाउँछ । त्यसमा पनि ८ ओटा हेलिकप्टर अटाउने ठाँउ क्षतिग्रस्त टर्किस एयरबसले ओगटेकोले पार्किङमा समस्या भएको उनले जानकारी दिए ।
गत फागुन २० गते ल्याण्डिङका क्रममा दुर्घटनाग्रस्त सो एयरबस करिव २ महिनादेखि विमानस्थलको पार्किङमा राखिएको छ । हाल सो एयरबसको मर्मतसंभार कार्य भइरहेको छ ।
विमानस्थलका अनुसार एयरबसले पार्किङका लागि मूल्य अभिबृद्धि कर बाहेक एउटा एयर बसले दैनिक पार्किङको १५ सय २४ डलर अर्थात १ लाख ५३ हजार ९ सय २४ रुपैयाँ शुल्क लिदै आएको छ । दैनिक ६ \६ घण्टाको ४ ओटा पार्किङ हुन्छ । एक पार्किङको ३ सय ८१ डलर शुल्क तिर्नुपर्छ ।
टर्कीस एयरवेजको सो दुर्घटनाग्रस्त एयरबस भने ‘इन्भेष्टिगेसन फेज’मा रहेकोले त्यसको शुल्क नलाग्ने श्रेष्ठले जानकारी दिए । अनुसन्धान अवधि सकिएपछी भने सो एयरबस पार्किङको शुल्क तिर्नुपर्ने उनले बताए ।
त्यस्तै विमानस्थलमा रनवे स्तरोन्नतीको कार्य पनि शुरु गरिएको बताइएको छ ।