बिजखबर संवाददाता
१५ माघ, काठमाडौं । प्रभु बैंकले र ग्राण्ड बैंकलाई एक्वीजीसन गर्न दुवै बैंकबीच समझदारी पत्रमा हस्ताक्षर भएको छ । प्रभु बैंकको केन्द्रिय कार्यालयमा उक्त सम्झौता भएको हो । साथै, वाणिज्य बैंक एक्वीजीसनमा गएको यो पहिलो हो ।
उक्त समझादारी पत्रमा प्रभु बैंकका तर्फबाट बैंकका संचालक तथा एक्वीजीसन कमिटिका संयोजक कुशुम लामा र ग्राण्ड बैंकका तर्फबाट संचालक तथा एक्वीजीसन कमिटिका संयोजक पवन अग्रवालले हस्ताक्षर गरेका थिए ।
बैंकलाई अझ शसक्त रुपमा अघि बढाउनका लागि ग्राण्ड बैंकलाई एक्वीजीसन गरिएको प्रभु बैंकका अध्यक्ष देवीप्रकाश भट्टचनले बताए । ‘एक्वीजीसनसँगै बैंकप्रति ग्राहकको विश्वास अझ बढ्नेछ,’ उनले भने, ‘एक्वीजीसनले खराव अवस्थामा रहेको बैंकलाई सुध्रिने मौका पनि दिनेछ ।’
एक्वीजीसन पश्चात बैंकको चुक्ता पूँजी ५ अर्व २० करोड ८८ लाख रुपैयाँ पुग्नेछ । त्यस्तै, निक्षेप ४५ अर्व ९० करोड रुपैयाँ पुग्ने छ भने कर्जा प्रवाह ३९ अर्व ५० करोड ९३ लाख रुपैयाँ पुग्ने बैंकले जानकारी दिएको छ । यसैगरी बैंकको शाखा संख्या १ सय २३ पुग्नेछ भने १ सय २४ वटा एटिएम काउण्टर रहनेछ ।
यस्तै बैंकले नेपाल विकास बैंकको प्रति सेयर ३० रुपैयाँका दरले किन्ने भएको छ । यदि सेयर धनीले सेयर नै लिन चाहेमा नेपालको ६ सेयर बरावर प्रभुको १ सेयर दिइने भट्टचनले बताए ।
यही भदौंमा किष्ट, प्रभु विकास बैंक, गौरीशंकर डेभलपमेन्ट बैंक र जेनिथ फाइनान्स एक आपसमा मर्ज भएर प्रभु बैंक बनेको थियो । साथै, प्रभु बैंकले चालु आर्थिक वर्षको पुस मसान्तसम्म ५० करोड रुपैयाँभन्दा बढी नाफा कमाउने भट्टचनले जानकारी दिए ।
