काठमाडौं । नेपालमा शतप्रतिशत भिट्रिफाइड टायल उत्पादन गरेको दावी गर्नै लामिनार टायल्स्ले काठमाडांैमा एस्क्लुसिभ फ्ल्यागशिप एक्सपिरियन्स सेन्टर संचालनमा ल्याएको छ ।
उपप्रधान तथा शहरी विकास मन्त्री प्रकाशमान सिंहले आज एक समारोहबीच उक्त सेन्टरको शुभारम्भ गरेका हुन् ।
औपचारिक उद्घाटन गरिएसँगै नयाँ घर बनाउन वा घरको पुर्ननिर्माण गर्न चाहने उपभोक्ता, निर्माणकर्मी, इञ्जिनियर र इन्टेरियर डिजाइनरका साथै टायलबारे रुची र सरोकार राख्ने जोकुकैको लागि उक्त सेन्टर खुल्ला भएको कम्पनीले जानकारी दिएको छ ।
एकै छानामा रहेर कम्पनीले उत्पादन गरिरहेको सम्पूर्ण संग्रहरुहरुका साथै नेपाली टाइलको नविनता प्रविधिको प्रत्यक्ष अवलोकन र अनुभव लिनको लागि अवसर प्रदान गर्ने उदेश्यका साथ गैरीधारा, उत्तरढोका अगाडी सेन्टरको स्थापना गरिएको कम्पनीको भनाई छ ।
सेन्टरको उद्घाटन गर्दै मन्त्री सिंहले नेपाली उत्पादनहरूको प्रयोग बढाउन आग्रह गर्दै, होटल, रेष्टुरेन्ट, भवन, अस्पताल वा व्यक्तिगत घर—जुनसुकै प्रकारको भौतिक संरचना निर्माण गर्दा पनि लामिनार भिट्रिफाइड टायल्स् प्रयोग गर्न अनुरोध गरे ।
विशेषगरी सातवटा संग्रहमा वर्गीकृत ४०० भन्दा बढी अन्तरराष्ट्रिय स्तरका डिजाइनहरूलाई प्रदर्शित गर्न चार हजार बर्गफिट क्षेत्रफलमा फैलिएको यो सेन्टरले निम्न क्षेत्रका लागि समाधानहरू प्रदान गर्दछ:
१) घर तथा व्यावसायिक भवनका भित्री भित्ता तथा भुइँ
२) शपिङ्ग मल, होटल, शैक्षिक संस्था, विमानस्थल जस्ता उच्च आवतजावतका क्षेत्रहरू
३) छत, बाल्कोनी, पोखरी, बाथरुम जस्ता पानीको सम्पर्कमा आउने वा भिज्ने तथा खुला क्षेत्रहरू
४) क्लाडिङ्ग, फसाड, ड्राइभवे र पार्किङका लागि बाहिरी प्रयोगका क्षेत्रहरु
सेन्टरमा ०.०८ प्रतिशतभन्दा कम पानी सोस्ने गुणयुक्त पूर्णतया भिट्रिफाइड टायलहरुलाई प्रदर्शनीमा राखिएका छन् जसले उच्च मजबुती, दिर्घकालीन टिकाउपन, दाग प्रतिरोधी विशेषताका साथ दिगो सौन्दर्यलाई सुनिश्चित गर्नेछन् ।
‘यो सेन्टर परम्परागत शोरूमभन्दा फरक छ जसलाई डिजाइन प्रेरणाको गन्तव्य र नेपालकै नवप्रवर्तनको अभूतपूर्व प्रमाणको रुपमा लिन सकिन्छ,’ लामिनार टायल्स्का अध्यक्ष धितालले भने, ‘हाम्रो एक्सपिरियन्स सेन्टर लामिनारको विश्वस्तरीय गुणस्तर, दिगो स्थानीय उत्पादन र डिजाइन–मुखी सोचप्रति समर्पणको प्रतीक हो ।’
लुम्बिनी सेरामिक्स् लिमिटेडद्धारा उत्पादित लामिनार टायल्स् बर्दियाको गुलरियास्थित अत्याधुनिक १४ विघा क्षेत्रफलमा अवस्थित उत्पादन केन्द्रमा निर्माण हुन्छ जसको दैनिक उत्पादन क्षमता एक लाख ४० हजार बर्गफिटभन्दा बढी रहेको छ ।
