बैंकिङ फ्रड बढेसँगै राष्ट्र बैंकको नयाँ कदम, वित्तीय संस्थाको एचआर नीतिमा हस्तक्षेप

काठमाडौं । पछिल्लो समय बैंक तथा वित्तीय संस्थामा ठगी बढेसँगै राष्ट्र बैंकले एचआर पोलिसीमा हस्तक्षेप गर्ने भएको छ । बैंक तथा वित्तीय संस्थाको मानव संसाधन एकदमै कमजोर भएका कारण बैंकिङ फ्रड बढेको निष्कर्ष निकाल्दै राष्ट्र बैंकले हस्तक्षेप गर्न लागेको राष्ट्र बैंकका गभर्नर डा. चिरञ्जीवी नेपालले जानकारी दिए ।

‘तपाँईहरुले बैंक तथा वित्तीय संस्थामा बैंकिङ क्षेत्रको सामान्य जानकारी समेत नभएको कर्मचारी राख्दा अहिले यस क्षेत्रमा ठगी बढेको हो,’ ग्लोबल आईएमई र जनता बैंक मर्जर पछिको एकिकृत कारोबार कार्यक्रममा बोल्दै उनले भने, ‘बैंकको चेक बुक कसलाई दिन हुन्छ हुँदैन भन्ने समेत ज्ञान नभएको कमचारी राख्दा म आफुलाई नियामक निकायको प्रमुख हुँ भन्न पनि लाज लागिरहेको छ ।’

राष्ट्र बैंकले कर्मचारीको क्षमता अभिवृद्धिका लागि नाफाको ३ प्रतिशत रकम छुट्याएपनि सो रकम उक्त क्षेत्रमा खर्च नगरेका कारण कर्मचारीहरुमा ज्ञानको कमि भएको उनको आरोप थियो ।

‘कर्मचारीलाई सामान्य जानकारी समेत नहुँदा बैंकिङ क्षेत्रमा ठगी बढेको निष्कर्ष निकाल्दै आगामी दिनमा बैंक वित्तीय संस्थाको एचआर पोलिसी नै राष्ट्र बैंकले बनाई दिने सोचमा छ अबका दिनमा तपाईहरु सच्चिएर अघि बढ्नुस ।’

यसैगरी अबका दिनमा बैंकहरु डिजिटल प्रविधिमा लगानी बढाउन समेत उनले निर्देशन दिए । बैंकहरुले अहिले डिजिटल प्रविधिमा एकदमै न्यून खर्च गरेको भन्दै अबका दिनमा द्रूत गतिमा बढाउनुपर्ने उनको तर्क थियो ।

कार्यक्रममा अर्थमन्त्री डा. युवराज खतिवडाले बैंकहरुले अबका दिनमा केवाईसी भनेजस्तै केवाईई समेत राख्नुपर्ने बताए । ‘अहिले बैंकहरुले ठेक्कामा कर्मचारी लिदाँ समस्या देखिएको छ,’ उनले भने, ‘त्यसरी चल्दैन अबका दिनमा नो योर कस्टुमर भनेजस्तै नो योर इम्प्वलाई समेत राख्नुपर्छ ।’


फेसबूक कमेन्ट गर्नुहोस्

Social Media Auto Publish Powered By : XYZScripts.com
DMCA.com Protection Status