काठमाडौं । नेपाल प्रवेश गर्ने सबै विन्दुहरु भदौ १६ गतेसम्म बन्द रहने भएका छन् । सोमबार बसेको मन्त्रिपरिषद बैठकले उक्त निर्णय गरेको हो । यस्तै बैठकले होटल रेष्टुरेन्टहरु संचालन भन्दा पनि डेलिभरी गर्ने सेवामात्रै संचालन गर्ने निर्णय गरेको छ । होटल चलाएपछि भिडभाड भएपछि यस्तो निर्णय गरिएको सरकारका प्रवक्ता डा. युवराज खतिवडाले बताए ।
उनका अनुसार भदौ १ गतेदेखि संचालनमा आउने लामो दुरीका सार्वजनिक यातायातलाई भदौ १५ गतेसम्म संचालनमा नल्याउने निर्णय भएको छ । यस्तै मन्त्रिपरिषद बैठकले सरकारी तथा गैर सरकारी संस्थाहरुले कर्मचारीहरुका लागि भने वर्क फ्रम होम सेवा लागु गर्न सकिने निर्णय गरेको छ । यस्तै मानिसहरुको जमघट, भेटघाट, बैठक, गोष्ठी, सेमिनारलगायत नगर्न पनि निर्देशन मन्त्रिपरिषद बैठकले गरेको छ ।
यस्तै धार्मिकस्थलहरुमा दैनिक नित्यपुजाबाहेक कुनै पनि कार्य नगर्नेसमेत निर्णय भएको छ । यस्तै सरकारले अघिल्लो मन्त्रिपरिषद बैठकले गरेका निर्णयहरुलाई संशोधन गर्दै उक्त निर्णयहरु गरेको हो । यस्तै सरकारले जीम, स्विमिङ पुल, पार्टी प्यालेसलगायत बन्द गर्ने निर्णयलाई पनि निरन्तरता दिईने बताएको छ ।