काठमाडौं ।अमेरिका र दक्षिण कोरियाबिच भएको व्यापारिक भेटवार्तामा कोरियन एयरले अमेरिकी विमान निर्माता बोइङसँग ठूलो सम्झौता गरेको छ। सम्झौताअनुसार कोरियन एयरले ५० वटा बोइङ ७३७-१० यात्रुवाहक विमान, ४५ वटा लामो दूरीका जेट र ८ वटा ७७७-८ फ्रेटर मालवाहक विमान खरिद गर्नेछ।
बोइङले यस सम्झौताले अमेरिकाभर करिब १ लाख ३५ हजार रोजगारीलाई सहयोग गर्ने जनाएको छ। विश्वभर बोइङमा करिब १ लाख ७० हजार कर्मचारी कार्यरत छन्। बोइङका व्यावसायिक विमान विभाग प्रमुख स्टेफनी पोपले यसलाई ‘ऐतिहासिक सम्झौता’ भन्दै स्वागत गरेकी छन्।
सम्झौता सार्वजनिक गर्ने कार्यक्रममा अमेरिकी वाणिज्य सचिव हावर्ड लुटनिक, दक्षिण कोरियाका व्यापार मन्त्री किम जुंग–क्वान, प्रविधि कम्पनी सामसङ र मोटर निर्माता ह्युन्डाइका शीर्ष अधिकारीहरू उपस्थित थिए। त्यस्तै, अमेरिकी चिप निर्माता एनभिडियाका प्रमुख जेन्सेन हुआङ पनि कार्यक्रममा सहभागी थिए।
दक्षिण कोरियाको सामसङको जहाज निर्माण विभागले अमेरिकी भिगर मरीन ग्रुपसँग मिलेर अमेरिकी नौसैनिक जहाज मर्मत कार्यमा सहयोग गर्ने सम्झौता गरेको छ। यसअघि सोलले अमेरिकी जहाज निर्माण उद्योगलाई सहयोगस्वरूप १५० अर्ब डलर समर्थन गर्ने घोषणा गरिसकेको थियो।
यस्तै, ह्युन्डाइ मोटर ग्रुपले पनि अमेरिकामा आफ्नो लगानी २१ अर्ब डलरबाट बढाएर २६ अर्ब डलर पुर्याउने घोषणा गरेको छ। कम्पनीले अमेरिका भित्रै वार्षिक ३० हजार ००० रोबोट उत्पादन गर्ने नयाँ कारखाना खोल्ने तयारी गरेको छ।
