काठमाडौं । डोनाल्ड ट्रम्प पुनः अमेरिकाको सत्तामा फर्किएपछि उनको परिवारको व्यापारिक गतिविधिमा नयाँ नयाँ घटना घटिरहेका छन । भियतनाम र इन्डोनेसिया जस्ता एसियाली देशहरू अहिले ट्रम्प परिवारलाई अर्बौं डलरका परियोजनाहरू दिएर अमेरिकासँग सम्बन्ध सुधार्ने दौडमा लागेका छन् । अचम्मको कुरा के छ भने धेरै देशले कानुनी प्रक्रियालाई बेवास्ता गर्दै यस्ता सम्झौतामा कानुनी सहुलियत दिइरहेका छन् ।
भियतनामको भिनफुक प्रान्तमा २० हजार करोड रुपैयाँको ‘ट्रम्प इन्टरनेशनल गल्फ रिसोर्ट’ परियोजना यस्तै एउटा घटनाको रूपमा लिइएको छ। भियतनाम सरकारले यसलाई राष्ट्रिय प्राथमिकताको रूपमा स्वीकृत गरेको छ। यसमा जग्गा प्राप्ति र वित्तीय जाँचजस्ता प्रक्रियालाई बेवास्ता गरिएको छ । स्रोतका अनुसार यो परियोजना ट्रम्पको परिवारसँग सम्बन्धित छ, त्यसैले कानुनी प्रक्रिया नलिई स्वीकृत गरिएको हो ।
भियतनाममा ट्रम्प गल्फ रिसोर्टको शिलान्यास गरिएको थियो । त्यसमा भियतनामका प्रधानमन्त्री फाम मिन्ह चिन स्वयम्, ट्रम्पका छोरा एरिक र बुहारी लारा सहभागी थिए । साथै, इन्डोनेसियाको बाली र पश्चिम जाभामा ट्रम्प परिवारलाई होटल र गल्फ कोर्सजस्ता परियोजनाहरू प्रस्ताव गरिएको छ। यसमा पनि कानुनी प्रक्रियालाई बेवास्ता गरिएको छ । भियतनाम र इन्डोनेसिया बाहेक टर्की र अजरबैजान जस्ता देशहरू पनि ट्रम्प परिवारलाई समर्थन गर्दै बिभिन्न उपहार दिन लागि परेका छन्।
टर्कीको इस्तानबुलमा रहेको ट्रम्प टावर आवासीय र कार्यालय परिसरजस्ता परियोजनाहरू ट्रम्पको परिवारलाई प्रस्ताव गरिएको छ। यी परियोजनाहरूमा डोगन होल्डिङसँग साझेदारी छ। उनलाई टर्कीका राष्ट्रपति रेसेप तैयप एर्दोगानको पार्टी एकेपीको निकट मानिन्छ।
उता, अजरबैजानको ट्रम्प अन्तर्राष्ट्रिय होटलमा लगानी गर्ने भएको छ । यो परियोजना व्यवसायी मामाडोभ सँग सहकार्यमा भइरहेको छ। तर, यहाँ पनि आर्थिक कारोबारको पारदर्शितामा प्रश्न उठेको छ । फिलिपिन्सले पनि ट्रम्प परिवारलाई परियोजना दिने विचार गरिरहेको छ। स्रोतका अनुसार ट्रम्पलाई परियोजना प्रस्ताव गर्न पर्दा पछाडि लबिङ भइरहेको छ भने पाकिस्तानको शाहबाज सरकारले ट्रम्पसँग साझेदारी गरिएको एआई परियोजनाका लागि २ हजार मेगावाट विद्युत् विनियोजन गरेको छ।
यो बिजुली प्रयोग गरेर बिटक्वाइन खरिद गरिनेछ। साथै, यो बिजुली एआई डाटा सेन्टरहरूमा पनि प्रयोग गरिने छ। पाकिस्तान सरकारले हालै अन्तर्राष्ट्रिय लगानी आकर्षित गर्न क्रिप्टोकरेन्सीलाई वैध बनाउने निर्णय गरेको छ । विज्ञप्तिमा भनिएको छ कि ४० मिलियन क्रिप्टो प्रयोगकर्ताहरूसँग, पाकिस्तानमा डिजिटल मुद्रामा अपार सम्भावना छ।
