काठमाडौं । राष्ट्रिय व्यवसायिक पहल (एनबीआई) को १९औँ वार्षिक साधारण सभाले नयाँ कार्यसमिति निर्विरोध निर्वाचित गरेको छ। सभाले अध्यक्षमा पुनः कुशकुमार जोशीलाई सर्वसम्मतिमा चयन गरेको हो।
नवनिर्वाचित कार्यसमितिमा उपाध्यक्षमा शकुन्तलाल हिराचन, महासचिवमा सुरेन्दवीर मालाकार, कोषाध्यक्षमा सरोज प्रसाद पाण्डे, सचिवमा सुरेश प्रधान तथा डा. बविन पोखरेल, सह–कोषाध्यक्षमा राजेश खड्का निर्वाचित भएका छन्। त्यस्तै सदस्यमा शिवप्रसाद घिमिरे, रमेश शर्मा, रविन्द्रमान सिंह प्रधान, लता प्याकुरेल, अरनिको राजभण्डारी, खेम लकाई, सरिता महर्जन, नेपाल हस्तकला महासंघतर्फबाट राजमान बज्राचार्य र नेपाल वैदेशिक रोजगार व्यवसायी संघतर्फबाट महेशकुमार बस्नेत निर्वाचित भएका छन्। साथै सभाले राजेश बाबु श्रेष्ठ, ध्रुवकुमार श्रेष्ठ, डा। राजेन्द्रकुमार घिसिङ, होमनाथ उपाध्याय र सनम शाक्यलाई कार्यसमिति सदस्यका रूपमा मनोनयन गरेको छ।
अध्यक्ष जोशीले सम्पूर्ण पदाधिकारी तथा सदस्यलाई बधाई ज्ञापन गर्दै व्यवसायिक क्षेत्रका अनुभवी व्यक्तित्वको सहभागितासहितको कार्यसमितिले आगामी दिनमा थप प्रभावकारी भूमिका निर्वाह गर्ने विश्वास व्यक्त गरे ।
महासचिव मालाकारले वार्षिक प्रतिवेदन प्रस्तुत गर्दै संस्थागत सामाजिक उत्तरदायित्वसम्बन्धी अवधारणा पत्र तयार, मानव अधिकार आयोगसँग छलफल, युएसएआईडी र युएनडिपीसँगको सहकार्यमा कार्यक्रम सञ्चालन, आचारसंहिता अनुगमन लगायतका गतिविधिबारे जानकारी गराएका थिए। सभाले आर्थिक प्रतिवेदन सर्वसम्मतिले पारित गरेको थियो।
कार्यक्रममा पूर्वमन्त्री तथा सल्लाहकार उमेश श्रेष्ठले मुलुकको आर्थिक अवस्था सन्तोषजनक नभएको भन्दै निजी क्षेत्रको आत्मविश्वास बढाउन आवश्यक कदम चाल्नुपर्ने सुझाव दिए। संस्थापक अध्यक्ष पद्म ज्योतिले नेपाल विकासोन्मुख मुलुकको श्रेणीमा स्तरोन्नति भइरहेको अवस्थामा अवसर र चुनौती दुवैलाई रणनीतिक रूपमा सामना गर्नुपर्नेमा जोड दिए ।
वरिष्ठ उद्यमी पद्म ज्योतिको संयोजकत्वमा द्वन्द्वकालीन समयमा स्थापना भएको राष्ट्रिय व्यवसायिक पहलले दुई दशकको अवधिमा दिगो शान्ति, आर्थिक तथा सामाजिक विकास, स्वच्छ व्यवसाय प्रवर्द्धन, संस्थागत सामाजिक उत्तरदायित्व, दिगो विकास र मानव अधिकारसम्बन्धी बहसमा महत्वपूर्ण भूमिका निर्वाह गर्दै आएको छ।
