काठमाडौं । नेपाल स्टक एक्सचेञ्ज (नेप्से) को दोस्रो बजारमा कारोबार भइरहेकामध्ये अहिले ३१ कम्पनीहरुको सेयर भाउ ३ सय रुपैयाँभन्दा कम रहेको छ । अहिले नेप्सेमा २५३ कम्पनीहरुको कारोबार हुँदै आएको छ ।
भदौ १२ गतेको कारोबारलाई आधारमान्दा ३१ कम्पनीको सेयर भाउ ३ सयभन्दा कम रहेको छ । सेयरभाउ ३ सयभन्दा कम हुनेमा अधिकांश जलविद्युत् समूहका कम्पनीहरु रहेका छन् । जलविद्युत् समूहका ३ कम्पनीको सेयर भाउ भने २ सय रुपैयाँभन्दा कम रहेको छ ।
विगत केही समयदेखि बजार साइडबेजमा हिडेको छ । २८ सयको वरिपरि घुमेको नेप्से परिसूचक भदौ १२ गते ३८.१० अंकले घटेर २ हजार ७ सय ८१ को बिन्दुमा आएको छ । अहिले वित्तीय सूचकहरु राम्रा भएका कम्पनीहरुको सेयर भाउ पनि निकै तल आएको छ ।
पछिल्लो समय न्यून चुक्ता पुँजी भएका कम्पनीहरुले बजारमा उच्च मूल्य पाउने गरेका छन् भने उच्च चुक्ता पुँजी भएका कम्पनीहरु न्यून मूल्यमा कारोबार हुँदै आएका छन् । अहिले अधिकांश वाणिज्य बैंकहरुको सेयर मूल्य ३ सय भन्दा मुनि छ । यता, लगानी समूहको निफ्राको सेयर मूल्य समेत ३ सयभन्दा मुनि नै छ ।
आधाभन्दा धेरै वाणिज्य बैंकको सेयर भाउ ३ सय रुपैयाँभन्दा कम
नेप्सेमा सूचीकृत आधाभन्दा बढी वाणिज्य बैंकको सेयर भाउ ३ सय रुपैयाँभन्दा कम रहेको छ । अहिले नेप्सेमा १९ वाणिज्य बैंकहरु सूचीकृत छन् भने यी मध्ये १० बैंकको सेयर भाउ ३ सय रुपैयाँभन्दा कम रहेको छ । सबैभन्दा कम सेयर भाउ हुने वाणिज्य बैंकमा कुमारी बैंक रहेको छ ।
भदौ १२ गते यस बैंकको सेयर भाउ २ सय १ रुपैयाँ निर्धारण भएको छ । त्यस्तै, सिटिजन बैंकको सेउर भाउ २ सय ९ रुपैयाँ ८ पैसा कायम भएको छ । त्यस्तै, ३ सय रुपैयाँभन्दा मुनि सेयर कारोबार हुनेमा नेपाल इन्भेष्टमेन्ट मेगा, प्रभु, लक्ष्मी सनराइज, माछापुच्छ«े, एनएमबि, ग्लोबल आइएमई, नेपाल र प्राइम कमर्सियल बैंक रहेका छन् ।
