काठमाडौं । कृषि विकास मन्त्रालयले प्रत्येक गाउँ विकास समितिमा कृषि प्राविधिक नयुक्तिको व्यवस्था मिलाउन कार्यविधी बनाइसकेको जानकारी दिएको छ । हाल कार्यविधी बनाएर स्वीकृतिका लागि अर्थ मन्त्रालयमा पेश गरिएको छ । कार्यविधी स्वीकृत भएर आउने वित्तिकै हरेक गाविसमा कृषि तथा पशु प्राविधिक राखिने मन्त्रालयद्वारा आयोजित पत्रकार सम्मेलनमा जानकारी दिएको छ ।
मन्त्रालयका अनुसार कार्यविधी स्वीकृति भएर आएपछि कम्तीमा ३ हजार गाविसमा कृषि तथा पशु प्राविधिक राखिने छ । साथै, बढी भूकम्प प्रभावित ८ जिल्लामा विभिन्न सामग्री, बीउ बिजन, वितरण भइसकेको छ नियमित कार्यक्रमहरु संचालनका लागि गृहकार्य भइरहेको समेत मन्त्रालयले जानकारी दिएको छ ।
कृषि बाली, मत्स्य तथा पशुपंक्षी बीमा प्रिमियममा अनुदान सम्बन्धमा चालु आर्थिक वर्षको पहिलो महिनामा १ करोड ५४ लाख ८६ रुपैयाँ भुक्तानी भएको र भदौं, असोज र कात्तिकको लागि झण्डै ५ करोड रुपैयाँ लाग्ने अनुमान गरेको छ ।
