काठमाडौंं । नेपालभरका सबै प्रदेशहरुमा सवारीचालक अनुमतिपत्र (लाईसेन्स)को परिक्षादेखि वितरणसम्म एकै किसिमले हुने भएको छ । भौतिक पूर्वाधार तथा यातायातमन्त्री मोहम्मद इस्तियाक राईको अध्यक्षतामा सातैै प्रदेशका यातायात मन्त्रीहरुको बैठकमार्फत सवारी चालक अनुमतिपत्र परीक्षा सञ्चालन कार्यविधि निर्देशिका २०७७ अनुसार परीक्षा लिने निर्णय गरिएको हो ।
यसअघि यातायात व्यवस्था विभागले गत जेठ १ गतेदेखि नै उक्त निर्देशिका लागु गर्ने गरी ल्याएपनि केहि प्रदेशले लागु गरेका थिएनन् । आजको बैठकले अब सबै प्रदेशले समान रुपमा काम गर्ने निर्णय भएको हो । यसमा खासगरी बागमति प्रदेशले नै हालसम्म निर्देशिका लागु गर्नमा अटेरी गरिरहेको थियो । यो निर्देशिका लागु हुने सहमतिसँगै बागमति प्रदेशका यातायात कार्यालयमा लाईसेन्सको परिषा दिँदा ७० अंक ल्याएपनि पास हुने व्यवस्था सुरु भएको छ ।
पुरानो प्रणालीअनुसार प्रयोगात्मक परीक्षामा एउटै गल्ती भए पनि लाइसेन्स लिन अयोग्य हुन्छ । तर नयाँ निर्देशिकामा ट्रायलका विभिन्न चरणलाई फरक–फरक अंकभार दिइएको छ र ७० अंक ल्याएमा लाइसेन्स लिन योग्य हुनेछ । अर्थात् सामान्य गल्ती गरे पनि लाइसेन्स पाउनबाट वञ्चित हुनुपर्दैन ।
३० मिनेटको परीक्षामा उत्तीर्ण हुन न्यूनतम ७० अंक ल्याउनुपर्नेछ । नयाँ व्यवस्थाअनुसार यातायात व्यवस्था विभागले अब लाइसेन्सका लागि अंकभारमा आधारित परीक्षा प्रणाली लागू हुन्छ ।
