चन्द्र ढकाल टीमलाई जिताउने निर्यात व्यवसायी महासंघको उद्घोष, क्रस भोटिङ नगरी सम्पूर्ण प्यानललाई भोट हाल्न अध्यक्ष गुरुङको आग्रह


बिजखबर संवाददाता
20 November, 2020 7:20 pm

काठमाडौं । निर्यात व्यवसायी महासंघ नेपाल (फिन) ले नेपाल उद्योग बाणिज्य महासंघको आसन्न निर्वाचनमा वरिष्ठ उपाध्यक्षमा उम्मेदवार चन्द्रप्रसाद ढकालको टीमलाई सहयोग गर्ने भएको छ ।

FoneLoan-250x250
Yamaha_250X250

निर्यातजन्य उद्योग व्यवसायको क्षेत्रमा सक्रिय वस्तुगत संघहरुले स्थापना गरेको निर्यात व्यवसायी महासंघ नेपालले वरिष्ठ उपाध्यक्षका उम्मेदवार चन्द्रप्रसाद ढकाल र बस्तुगत उपाध्यक्ष उमेशलाल श्रेष्ठ र सो टीमका वस्तुगततर्फका सदस्यका उम्मेदवारहरुलाई स्वागत तथा शुभकामना दिँदै सो टीमलाई खुला रुपमा सहयोग गर्ने उद्घोष गरेको हो ।

महासंघले आज रोयल बैंकेटमा एक कार्यक्रम ढकाल टीमलाई स्वागत तथा जीतको अग्रीम शुभकामना दिँदै उक्त फिन अन्तगरगतका ११ ओटा वस्तुगत संघका अध्यक्षहरुले खुला रुपमा उक्त टीमलाई मतदान गर्ने उद्घोष गरेको हो ।

स्वागत तथा शुभकामना कार्यक्रममा निर्यात व्यवसायी फिनका अध्यक्ष तथा प्रदेश सांसद रामबहादुर गुरुङ्गले महासंघमा वस्तुगत सदस्यहरुको हितका लागि वरिष्ठ उपाध्यक्षका उम्मेदवार ढकाल र उपाध्यक्ष उमेशलाल श्रेष्ठको टीमलाई जिताउनु पर्ने बताए । ‘व्यवसायीक हितका लागि पनि हामीले महासंघको आसन्न निर्वाचनमा व्यवसायीक टीमलाई जिताउनुपर्छ,’ उनले भने, ‘यसका लागि हामीले ढकालले नेतृत्व गरेको टीमलाई भारी बहुमतले जिताउनु पर्छ ।’

अहिलेको अवस्थामा सरकारले व्यवसायीको समाधानमा लागि वेवास्ता गरेको भन्दै सरकारसँग छलफल र सहकार्य गरेर आफ्ना समस्या समाधान गराउनका लागि पनि वरिष्ठ उपाध्यक्षका उम्मेदवार ढकालले नेतृत्व गरेको उमेशलाल श्रेष्ठको टीमलाई जिताउनुको विकल्प नरहेको गुरुङको दावी थियो ।

‘म यस फिन अन्तरगत रहेको सम्पूर्ण सदस्यहरुलाई क्रस नगरी ढकालले नेतृत्व गरेको टीमको सम्पूर्ण सदस्यहरुलाई नै मतदान गर्न आग्रह गर्दछु,’ गुरुङले भने, ‘यदि हामीले सानोदेखि ठूलो व्यवसायसम्म सफल रुपमा संचालन गर्दै आउनु भएको ढकालले नेतृत्व गरेको टीमलाई नै जिताउन सक्यौ भने हाम्रो समस्या पनि समाधान आशा लिएका छौं ।’ साथै अबका दिन सरकारसँग दुई धारमा नभई सहकार्य गरेर व्यवसायीका समस्या समाधान गर्न समेत ढकाल समुहलाई आग्रह गरेका थिए ।

कार्यक्रममा बोल्दै फिन अन्तरगत रहेका बस्तुगत संघका अध्यक्षहरुले स्वतः अध्यक्ष भैसकेका शेखर गोल्छाले एउटा टिमको नाममा महासंघभित्र कार्टेलिङ गरेको भन्दै त्यसलाई तोड्न पनि ढकाल प्यानललाई भोट दिनुपर्ने बाध्यता रहेको बताएका छन् ।

‘चुनावी प्रतिस्पर्धामा रहेका दुबै प्यानलको सर्वमान्य अध्यक्ष भएर बस्नुपर्ने व्यक्तिले अहिले एउटा टीम खडा गरी उक्त टीमलाई जिताउन दर्जनौं व्यक्तिलाई मनोनितको बल्छी फालेर हिडेका छन्,’ कार्यक्रममा फिन अन्तरगत रहेको बस्तुगत संघका अध्यक्षहरुले भने, ‘गोल्छाको उक्त व्यवहारले महासंघका दुर्घटना निम्तने छ तसर्थ महासंघलाई दुर्घटनाबाट बचाउनका लागि पनि ढकाल प्यानललाई जिताउनुपर्ने छ ।’

फिनमा निर्यात क्षेत्रका कार्यरत ११ ओटा वस्तुगत संस्थाहरु रहेका छन् । जसमा नेपाल गलैचा निर्यात संघ, गार्मेण्ट एशोसिएशन, नेपाल पश्मिना उद्योग संघ, नेपाल हातेकागज संघ, नेपाल हब्र्स एण्ड हर्बल उत्पादक संघ, स्वतन्त्र ऊर्जा उत्पादक संघ नेपाल, अलैची उत्पादक संघ, अदुवा प्रषोधन तथा व्यापार संघ, नेपाल बोटल वाटर उद्योग संघ र सिल्क एशोसिएशन रहेका छन् ।

सो कार्यक्रममा सबै संघका अध्यक्ष तथा प्रतिनिधिको उपस्थिती रहेको थियो । कार्यक्रममा वरिष्ठ उपाध्यक्षका उम्मेदवार ढकालले आफ्नो सुरुवाती व्यवसाय नै निर्यात क्षेत्रबाट सुरु गरेको जानकारी दिँदै आफुपनि फिन भित्रैकै एक सदस्यको रुपमा रहेको यस क्षेत्रको विकासका लागि काम गर्ने बताए । ‘म चुनावको क्रममा यहाँ आएर भोट मात्रै माग्ने र पछि वास्ता नगर्ने भन्ने म र मेरो टीमबाट हुँदैन जुन कुराको यहिँ हलबाट प्रतिवद्धता जाहेर गर्दछु,’ ढकालले भने, ‘हाम्रो टीम जितेर गएपछि तपाईहरुले गर्व हुनेगरी काम गरेर देखाउनेछु ।’ साथै व्यवसायिक समस्या पहिचान गरी तत्काल समाधान गर्नका लागि स्केट होल्डर चाहिने भन्दै त्यसका लागि पनि आफ्नो टीमलाई जिताउन उनको आग्रह थियो ।

कार्यक्रममा फिनका उपाध्यक्ष एवं सिल्क एशोसिएशनका अध्यक्ष शंकर पाण्डेले महासंघ कमजोर हुँदा सम्पूर्ण निजी क्षेत्र कमजोर हुनेभन्दै निजी क्षेत्र एक भएर अघि बढ्नुपर्ने बताए ।

कार्यक्रममा वस्तुगततर्फका उपाध्यक्षका उम्मेदवार उमेशलाल श्रेष्ठले आफ्नो टीमको विजयीसँगै महासंघले फिनसँग सहकार्य गर्दै निर्यात प्रवद्र्धनमा काम गर्ने बताए । ‘देशको कुल ग्राह्स्थ्य उत्पादनमा ७० प्रतिशत योगदान दिने निजी क्षेत्रलाई सरकारले हेर्ने दृष्टिकोण एकदमै नकारात्मक छ त्यसलाई परिवर्तन गर्नु जरुरी छ,’ उनले भने, ‘हाम्रो धेरै एजेण्डा छैनन्, हामीले सरकारले निजी क्षेत्रलाई हेर्ने दृष्टिकोणमा परिवर्तन ल्याउँदै देशको आर्थिक वृद्धिका योगदान पुर्याउने हो ।’ साथै उनले कार्यक्रममा पटक पटक हारेका व्यक्ति अहिले पनि चुनावी मैदानमा रहेको भन्दै आफु सगरमाथा चढ्न हिडेको व्यक्ति अहिले वेशक्याम्पमा पुगेको बताए ।

यसैगरी महासंघका पूर्व अध्यक्ष एवं विशिष्ट सदस्य चण्डीराज ढकालले फिन अन्तरगतका सम्पूर्ण सदस्यहरुले ढकाल प्यानललाई बोलाएर समर्थन गर्नुनै यस टीमको जितको स्पष्ट आधार भएको बताए । कुनै समय देशमा बढी रोजगारी दिई वैदेशिक मुद्रा भित्र्याउँदै देशको आर्थिक वृद्धिमा योगदान दिने निर्यात क्षेत्र रहेको जानकारी दिँदै अबका दिनमा यस क्षेत्रको प्रर्वद्र्धनका लागि चन्द्र ढकाल टीमले काम गर्ने बताए । व्यवसायीलाई समस्या पर्दा सहज रुपमा उपलब्ध हुने व्यक्तिलाई महासंघको नेतृत्वमा पुर्याउनुपर्ने बताउँदै त्यसका लागि चन्द्र ढकाल र उमेशलाल श्रेष्ठको टीम उपयुक्त भएको बताए ।

ढकाल प्यानलबाट वस्तुगत उपाध्यक्षमा उमेशलाल श्रेष्ठ र सदस्यहरुमा हेमराज ढकाल, आकाश अधिकारी, सुबोध गुप्ता, रविनकुमार श्रेष्ठ, प्रकाससिंह कार्की, कमला श्रेष्ठ, नरेशलाल श्रेष्ठ, सुमितकुमार केडिया, भक्तबहादूर हमाल, सुभाष भण्डारी, जयप्रसाद शिवाकोटी, हरिबहादूर कार्की, रामकृष्ण श्रेष्ठ र सूर्यबहादूर मगर रहेका छन् ।

प्रतिक्रिया दिनुहोस्