नगरपालिकाले उपचारमा खटिने कर्मचारीलाई १० लाख दिने, फिल्डमा जाँदा २५ लिटर ईन्धन निशुल्क

नगरपालिकाले उपचारमा खटिने कर्मचारीलाई १० लाख दिने, फिल्डमा जाँदा २५ लिटर ईन्धन निशुल्क

काठमाडौं । गोदावरी नगरपालिकाले आफ्नो नगरमा कार्यरत कर्मचारीलगायत स्वास्थ्यकर्मीको परिवारलाई १० लाख रुपैयाँ उपलब्ध गराउने भएको छ ।

नगरपालिकाको शनिबार बसेको आकस्मिक बैठकले विश्वव्यापीरूपमा फैलिरहेको कोभिड–१९ उपचारका क्रममा यदि कोही कर्मचारी वा स्वास्थ्यकर्मी यसबाट संक्रमित भई मृत्यु भएमा निजको परिवारलाई १० लाख रुपैयाँ उपलब्ध गराउने निर्णय गरेको हो । नगरपालिका प्रमुख गजेन्द्र महर्जनले उक्त रोगबाट हुन सक्ने जोखिम न्यूनीकरणका लागि सो योजना अघि बढाइएको बताएका हुन ।

उनले भने, ‘हाल कोरोना भइरसका कारण पूरै देश लकडाउन भइरहेको अवस्थामा उक्त रोगसम्बन्धी उपचार, रोकथाम, जनचेतना फैलाउने कार्यमा नगर क्षेत्रभित्र खटिएका स्वास्थ्यकर्मी, जनप्रतिनिधि, कर्मचारीलगायत सो रोगबाट संक्रमित भई उपचार गर्नुपरेमा हामीले निःशुल्क उपचार गर्ने समेत निर्णय गरेका हौं ।’

मुलुकमा लकडाउन अवधिभर स्वास्थ्य चौकीमा कर्तव्य निर्वाह गर्ने स्वास्थ्यकर्मी र टोलटोलमा खटाइएका स्वास्थ्यकर्मीलाई एक महिनाको २५ लिटरका दरले इन्धन दिने निर्णयसमेत नगरपालिकाले गरेको छ । यसैगरी गोदावरीले आफ्नो कार्यक्षेत्रमा खटिएका स्वास्थ्यकर्मीलाई प्रतिदिन ५ सय रुपैयाँका दरले प्रोत्साहनभत्ता उपलब्ध गराउने निर्णय गरेको महर्जनले जानकारी दिएका छन ।

नगरपालिकाले दिनानुदिन बढिरहेको जोखिमलाई न्यूनीकरण गरी नगरवासीलाई सुरक्षित राख्न अत्यावश्यक कामका लागि प्रत्येक वडालाई २ लाख रुपैयाँ बराबरको खर्च दिने निर्णयसमेत गरेको छ । यसैगरी गोदावरीले लकडाउनको समयमा यहाँ रहेका अपाङ्गता भएका महिला, ६ महिनासम्मको सुत्केरी, दैनिक ज्याला मजदुरी गरी यसैबाट जीवन निर्वाह गर्न बाध्य श्रमिक तथा मजदुर र एकल महिलाको विवरण संकलन गरि विशेष राहत प्याकेज ल्याउने निर्णयसमेत गरेको छ/रासस


फेसबूक कमेन्ट गर्नुहोस्

DMCA.com Protection Status