काठमाडौं । चालु आर्थिक बर्षको ९ महिना (साउनदेखि चैतसम्म) विदेश पढ्न जाने नेपाली विद्यार्थीले ९५ अर्ब ८५ करोड रुपैयाँ लिएका छन् । यो गत आर्थिक बर्षको यहि अवधिको तुलनामा २८ अर्ब ६६ करोड रुपैयाँले बढि हो ।
नेपाल राष्ट्र बैंकले सार्वजनिक गरेको तथ्यांक अनुसार गत आर्थिक बर्षको यहि अवधिमा नेपाली विद्यार्थीले विदेशमा पढ्न जानलाई जम्मा ६७ अर्ब १९ करोड रुपैयाँ लिएका थिए । यस्तो रकम विद्यार्थीहरुले विदेशका विद्यालय, कलेज र विश्वविद्यालयहरुलाई अध्यापनका लागि बुझाउने रकम हो ।
यसैका कारण नेपालको सेवा खाता भने लगातार दवावमा परेको तथ्यांकमा देखिन्छ । राष्ट्र बैंकले सार्वजनिक गरेको तथ्यांक अनुसार चालु आर्थिक बर्षको ९ महिनामा नेपालको खुद सेवा आय ५२ अर्ब २३ करोड रुपैयाँले घाटामा रहेको छ ।
गत आर्थिक बर्षको यहि खुद सेवा आय ६३ अर्ब ९१ करोडले घाटामा थियो ।
सेवा खाता अन्तर्गत चालु आवको ९ महिनामा भ्रमण आय ४० प्रतिशतले वृद्धि भई ६० अर्ब ४५ करोड रुपैयाँ नेपाल भित्रिएको छ । गत आर्थिक बर्षको यहि समयमा यस्तो आय ४३ अर्ब १७ करोड रुपैयाँ पुगेको थियो । यता भ्रमण व्यतर्फ भने चालु आवको ९ महिनामा ४२.५ प्रतिशतले वृद्धि भई १ खर्ब ४३ अर्ब २२ करोड रुपैयाँ पुगेको छ । यसमध्ये शिक्षातर्फको व्यय ९५ अर्ब ८५ करोड रहेको छ ।
