बिजखबर संवाददाता
११ चैत, काठमाडौं । मजदूर आन्दोलनमा कारण विगत १३ दिनदेखि बन्द रहेको निर्मार्णाधिन माथिल्लो तामाकोशी जलविद्युत् आयोजना आजदेखि खुलेको छ । मजदूरका माग सम्बोधन गर्न छुट्टै कार्यदल बनाउने सहमति भएपछि आन्दोलन स्थगित गरी मजदूरहरु काममा फर्केका हुन् ।
आज आयोजनाको व्यवस्थापन पक्ष र आन्दोलनरत मजदूरहरुको संस्था क्यूपेक नेपालले एक सहमति गरी ७ दिनभित्र विज्ञ सहितको कार्यदल बनाउने निर्णय गरेको छ । सो कार्यदलले ३० दिनभित्र प्रतिवेदन पेश गर्ने आयोजनाका प्रवक्ता गणेश न्यौपानेले जानकारी दिए ।
उक्त प्रतिवेदनले मजदूरको मागलाई सम्बोधन गर्नुपर्ने उक्त सम्झौतामा उल्लेख गरिएको छ । आयोजनामा भइरहेको बन्द हड्ताल खुलाउनका लागि जिल्ला प्रशासन र मजदूरबीच पटक–पटक वार्ता भएको थियो । उक्त वार्ताबाट पनि निकास ननिक्लिएपछि छुट्टै कार्यदल नै बनाउनु परेको हो । बन्द हड्तालले गर्दा दोलखावासीका लागि जारी गर्न लागिएको १० प्रतिशत सेयर समेत स्थगित भएको छ ।
मजदूरले आफुहरुले पनि प्रतिव्यक्ति ५ सय कित्ता सेयर पाउनुपर्ने माग राखी आन्दालनमा उत्रिएका थिए । आगामी दिनमा मजदूरलाई केकति सेयर दिने भन्ने विषयमा उक्त कार्यदलले नै टुङ्गो लगाउने छ । आयोजनामा नेपाली, भारतीय र चिनियाँ नागरिक गरी झण्डै १ हजार ५ सय मजदूर कार्यरत छन् । सोमध्ये सिनो हाइड्रोमा कार्यरत ८ सय ५० जना मजदूर भने सेयर माग गर्दै आन्दोलनमा उत्रिएका हुन् ।
प्रवक्ता न्यौपानेका अनुसार निर्माणधिन सो आयोजनाको ७३ प्रतिशतभन्दा बढी काम सम्पन्न भएको छ । कुल ३५ अर्व २९ करोड रुपैयाँ लागतमा बन्न लागेको सो आयोजनाबाट ४ सय ५० मेगावाट विद्युत उत्पादन हुनेछ ।
