काठमाडौँ । नेपाल घुम्न आएका पर्यटकको पासपोर्ट बाँदरले लगेको छ । पासपोर्ट बाँदरले लगेको जानकारी गराएपछि खोजीका लागि प्रहरी खटाइएको जिल्ला प्रहरी कार्यालय पर्वतले जनाएको छ ।
प्रहरी प्रमुख डीएसपी विजय यादवका अनुसार अस्ट्रेलियाबाट नेपाल घुम्न आएका पर्यटकको पासपोर्ट पर्वतको बन्जी जम्प नजिकबाट बाँदरले लिएर भिरतिर भागेको हो । अस्ट्रेलियन नागरिकसहित नेपालकै अर्का एक पर्यटकको पनि सोही झोलामा रहेको पासपोर्ट बाँदरले लगेको छ ।
प्रहरीका अनुसार शनिबार मुक्तिनाथ जान निस्किएका उनीहरूको पासपोर्ट कुस्मामा बन्जी घुम्न गएको बेलामा झोला गाडीको छतमा राखिएको थियो । उनीहरू बन्जीबाट फर्किँदा उक्त झोला बाँदरले लगेको उनीहरूले जानकारी प्रहरीलाई गराएका थिए ।
खोजीका लागि नेपाल प्रहरी र सशस्त्र प्रहरीको टोली खटिएको थियो । ‘हिजो सई सावको नेतृत्वमा ७ जना पठाएका थियौँ । आज सशस्त्र पनि जानुभयो,’ यादवले भने, ‘तर भेटिएको छैन । जङ्गलतिर होला भनेर खोजिएको हो । भीरहरू छ, छिर्नै गाह्रो छ ।’
उक्त पासपोर्टसहितको झोला नभेटिएपछि उनीहरूले प्रहरीमा निवेदन समेत दर्ता गरेका छन् । खोजी कार्य जारी रहेको प्रहरीले जनाएको छ ।
