काठमाडौं । नेकपा (एमाले) का अध्यक्ष केपी शर्मा ओलीले आफ्नो पार्टी सधैंका लागि सरकारबाट हट्यो भन्ने भ्रममा कोही पनि नपर्न आग्रह गरेका छन् ।
बुधबारदेखि सुरु भएको एमालेको केन्द्रीय समिति बैठकलाई सम्बोधन गर्दै उनले देशको लागि एमाले चाहिने बताए । एकछिन सरकारबाट हट्दैमा एमाले सधैंका लागि हट्यो भन्ने भ्रममा नपर्न उनले आग्रह गरे ।
‘देशका लागि नेकपा (एमाले) चाहिन्छ । अहिले हामी एकछिन सरकारबाट हट्यौं भनेर अब सधैंका लागि एमाले सरकारबाट हट्यो भन्ने ठानेको होला कतिपयले । यो भ्रममा कोही पनि नपर्दा हुन्छ भन्ने म ठान्छु,’– उनले भने ।
उनले एमाले सरकारमा भएकै बेला चीनसँट ट्रान्स्पोर्ट ट्रान्जिट एग्रिमेन्ट भएको, दैलेखमा ग्यास खानीको सर्वेक्षण गरेको, नवलपरासीको धौवादीमा फलाम कारखानाको सम्भाव्यताका अध्ययन सुरु गरिएको बताए । ती कामहरु असाधारण महत्वका रहेको र अबको केही समयपछि नेपालले व्यवसायिक उत्पादन सुरु गर्ने उनले बताए ।
