काठमाडौं । बुधबारबाट बञ्चरेडाँडाबासीले फोहोर फल्न नदिने भएका छन् । काठमाडौं उपत्यकाको फोहोरमैला व्यवस्थापन हुँदै आएको सिसडोल बञ्चरेडाँडा कुँडुले ल्याण्डफिल साईटमा स्थानीयले बुधबारबाट फोहोर फाल्न नदिने तयारी गरेका हुन् । ३ वर्ष अगाडी काठमाडौं महानगरपालिकासँग भएको सहमति कार्यान्वयन नभएपछि बाध्य भएर फोहोर फाल्न बन्द गर्नुपर्ने अवस्थामा पुगेको स्थानीय निरञ्जन सञ्जेलले बताए ।
२०७९ साल जेठ २६ गते काठमाडौं महानगरपालिका र बञ्चरेडाँडाबासीबिच १८ बुदे सहमति भएको थियो । फोहोर बोक्ने गाडी रातीको समयमा मात्र चल्नुपर्ने, बत्ति तथा सडक स्तरोन्नतीको काम तिन महिनाभित्र पुरा गर्नुपर्ने, वैज्ञानीक माध्यमबाट लिच्चड व्यवस्थापन गर्नुपर्ने, प्रभावित क्षेत्रको पहिचान गरी अधिग्रहण, मुआब्जा वितरणमा काठमाडौं महानगरले केन्द्र सरकारसँग पहल गर्ने लगाएतको विभिन्न विषयमा सहमति भएको थियो ।
सहमतीपत्र अनुसार तिन देखी छ महिनाभित्र सबै माग सम्बोधन गर्ने भनिएतापनि तीन वर्ष पुग्दा समेत काठमाडौं महानगरले बेवास्ता गरेपछि बाध्य भएर फोहोर बोक्ने गाडी रोक्ने निर्णयमा पुगेको सञ्जेलले बताए । महानगरसँगको सहमतीपत्रबारे शहरी विकासमन्त्री कुलमान घिसिङलाई पनि जानकारी गराएको भन्दै सञ्जेलले माग सम्बोधन नभएसम्म बञ्चरेडाँडामा फोहोर फाल्न नदिने बताएका हुन् ।
उनका अनुसार फोहोर बोक्ने गाडी चालकलाई पनि फोन मार्फत बुधबारदेखी बञ्चरेडाँडामा फोहोर ल्याउन नपाईनेबारे जानकारी गराईएको छ ।
