काठमाडौं । नेपाल उद्योग वाणिज्य महासंघ र कोरियन महिला उद्यमी संघबीच एक सम्झौता भएको छ । महिला उद्यमशीलताको विकासमा सहकार्य गर्ने उद्देश्यले नेपाल उद्योग वाणिज्य महासंघ र कोरियन महिला उद्यमी संघ बीच हालै कोरियाको राजधानी सिओलमा एक सहमतीपत्रमा हस्ताक्षर भएको हो ।
सहमतीपत्रमा नेपाल उद्योग वाणिज्य महासंघको महिला उद्यमी विकास समितिका सभापति कमला श्रेष्ठ र कोरियन महिला उद्यमी संघको इन्चोन शाखाका सभापतिले हस्ताक्षर गरेका हुन ।
महिला उद्यमीहरूद्वारा संचालित व्यापार व्यवसायमा सहयोग एवं सहकार्य गर्ने, आपसी सम्पर्क विस्तारका माध्यमबाट सहकार्यका क्षेत्रहरू पहिचान गरी सहयोग बढाउने, सूचना तथा व्यवसायिक भ्रमणको आदान प्रदान गर्ने, महिला उद्यमीहरूद्वारा संचालित उद्योग व्यवसायको क्षमता अभिवृद्धिका लागि सम्भाव्य क्षेत्रमा प्राविधिक सहयोग उपलव्ध गराउने कुरा सहमतीपत्रमा उल्लेख गरिएको छ ।
नेपाल र कोरिया बीच आर्थिक व्यवसायिक सम्बन्ध विस्तार गर्ने उद्देश्यले महासंघको महिला उद्यमी समितिका सभापति श्रेष्ठको नेतृत्वमा महासंघको एक प्रतिनिधिमण्डल कोरियाको भ्रमणमा गएको थियो ।
भ्रमणका क्रममा कोरियाको साना तथा मझौला उद्यमीहरूको संस्था संंग आवद्ध उद्यमी व्यवसायीहरू, गैह्र आवासीय नेपालीहरू, नेपाली राजदूतावासका पदाधिकारीहरू समक्ष भेटवार्ता गरी दुई देश बीचको आर्थिक व्यवसायिक सम्बन्ध विस्तार, सहकार्यका सम्भाव्य क्षेत्रका विषयमा गहन छलफल गरेको थियो ।
